మమ్మల్ని రక్షించండి.. ప్రధాని మోదీ, సీఎంలకు బహ్రెయిన్‌లోని తెలుగువారి విజ్ఞప్తి

పశ్చిమాసియాలో నెలకొన్న తీవ్ర ఉద్రిక్తతల కారణంగా తెలంగాణ, ఏపీకి చెందిన పలువురు పర్యాటకులు బహ్రెయిన్‌లో చిక్కుకుపోయారు. తమను వెంటనే సురక్షితంగా స్వదేశానికి తరలించాలని వారు కేంద్ర, రాష్ట్ర ప్రభుత్వాలను వేడుకుంటున్నారు. హైదరాబాద్‌కు చెందిన సల్మాన్ రాజ్ అనే వ్యక్తి, తమ బృందం పడుతున్న ఇబ్బందులను వివరిస్తూ ఒక వీడియో సందేశాన్ని విడుదల చేశారు.

వివరాల్లోకి వెళితే.. ఫిబ్రవరి 24న తెలుగు రాష్ట్రాలకు చెందిన పర్యాటకుల బృందం టూరిస్ట్ వీసాపై బహ్రెయిన్ వెళ్లింది. నాలుగు రోజుల పర్యటన ముగించుకుని తిరిగి హైదరాబాద్ రావాల్సి ఉండగా, పశ్చిమాసియాలో అకస్మాత్తుగా యుద్ధ వాతావరణం నెలకొంది. ఈ పరిణామాలతో విమానాశ్రయాలు మూతపడటం, విమాన సర్వీసులు రద్దు కావడంతో వారి ప్రయాణానికి ఆటంకం ఏర్పడింది.

ఈ సందర్భంగా సల్మాన్ రాజ్ వీడియోలో మాట్లాడుతూ... "మేము భారత ప్రభుత్వంతో పాటు ఏపీ, తెలంగాణ ప్రభుత్వాల సహాయం కోరుతున్నాం. టూరిస్ట్ వీసాపై ఇక్కడికి వచ్చాం. తిరిగి వెళ్లేందుకు ఎయిర్‌పోర్ట్‌కు వెళ్లగా, అక్కడ బాంబులు, క్షిపణుల దాడులు జరుగుతున్నాయి. చెక్-ఇన్ కౌంటర్లు మూసివేశారు. సరైన సమాచారం ఇచ్చేవారు కూడా లేరు" అని ఆవేదన వ్యక్తం చేశారు.

పరిస్థితి చాలా ప్రమాదకరంగా ఉందని, తమ బృందంలో ఉన్న వృద్ధులు తీవ్ర ఇబ్బందులు పడుతున్నారని ఆయన తెలిపారు. "మాలో కొందరికి డయాబెటిస్, అధిక రక్తపోటు ఉన్నాయి. ఇక్కడ వైద్యుడి ప్రిస్క్రిప్షన్ లేకుండా మందులు ఇవ్వడం లేదు. ఇరుకైన అపార్ట్‌మెంట్లలో తలదాచుకుంటున్నాం. మా పరిస్థితి దారుణంగా ఉంది. ఇక్కడి తెలుగువారు ఎవరో దయతలచి రోజుకు ఒక పూట భోజనం పెడుతున్నారు" అని వివరించారు. ప్రధాని నరేంద్ర మోదీ, ఏపీ సీఎం చంద్రబాబు, తెలంగాణ ముఖ్యమంత్రి రేవంత్ రెడ్డి జోక్యం చేసుకుని, తమను వీలైనంత త్వరగా స్వదేశానికి సురక్షితంగా తరలించే ఏర్పాట్లు చేయాలని ఆయన విజ్ఞప్తి చేశారు.

బృందంలోని ఓ వృద్ధురాలు మాట్లాడుతూ... "మా దగ్గర ఉన్న డబ్బులన్నీ అయిపోయాయి. తినడానికి కూడా కష్టంగా ఉంది. ఇండియాలో ఉన్న మా కుటుంబ సభ్యులు ఆందోళన చెందుతున్నారు. దయచేసి మమ్మల్ని ఇంటికి పంపించండి" అని కన్నీటిపర్యంతమయ్యారు. మరో 73 ఏళ్ల మహిళ మాట్లాడుతూ... "నా బీపీ, షుగర్ మందులు అయిపోయాయి. ప్రిస్క్రిప్షన్ లేదని ఇవ్వడం లేదు. దయచేసి మాపై కరుణ చూపించి, త్వరగా ఇంటికి చేర్చండి" అని వేడుకున్నారు.