బాలీవుడ్ నటుడు సంజయ్ దత్‌ను కలిసిన నారా లోకేశ్... ఫొటోలు ఇవిగో!

ఆంధ్రప్రదేశ్ విద్య, ఐటీ శాఖ మంత్రి నారా లోకేశ్ ముంబై పర్యటనలో భాగంగా ప్రముఖ బాలీవుడ్ నటుడు సంజయ్ దత్‌తో మర్యాదపూర్వకంగా భేటీ అయ్యారు. ఈ సందర్భంగా రాష్ట్రంలో సినిమా పరిశ్రమ అభివృద్ధి, మౌలిక వసతుల కల్పనపై ఇరువురూ కాసేపు చర్చించుకున్నారు. ముఖ్యంగా ఏపీలో సినిమా షూటింగ్‌లకు అనుకూలమైన వాతావరణం కల్పించడంపై ప్రధానంగా దృష్టి సారించారు.

ఏపీలో అంతర్జాతీయ ప్రమాణాలతో కూడిన కొత్త 'ఫిలిం సిటీ'ని ఏర్పాటు చేసే అవకాశాలపై సంజయ్ దత్‌తో లోకేశ్ చర్చించారు. రాష్ట్రంలో సినిమా షూటింగ్‌లు జరుపుకునే వారికి ఎలాంటి ఇబ్బందులు లేకుండా, వేగంగా అనుమతులు మంజూరు చేసేందుకు 'సింగిల్ విండో' విధానాన్ని తీసుకురావాలనే ఆలోచనను ఆయన పంచుకున్నారు. ఈ విధానం వల్ల నిర్మాతల సమయం ఆదా అవ్వడంతో పాటు, ఏపీ వైపు సినీ పరిశ్రమ ఆకర్షితమవుతుందని భావిస్తున్నారు.

ఈ భేటీ అనంతరం నారా లోకేశ్ సోషల్ మీడియా వేదికగా స్పందిస్తూ.. "లెజెండరీ బాలీవుడ్ స్టార్ సంజయ్ దత్‌ను కలవడం చాలా ఆనందంగా ఉంది. ఏపీలో సినిమా షూటింగ్ ఎకోసిస్టమ్‌ను సృష్టించే అవకాశాలపై నేను చాలా ఉత్సాహంగా ఉన్నాను" అని పేర్కొన్నారు. పరిశ్రమలు, పెట్టుబడుల ఆకర్షణలో భాగంగానే వినోద రంగాన్ని కూడా ఏపీలో బలోపేతం చేసే దిశగా ప్రభుత్వం అడుగులు వేస్తోంది. ఇందులో భాగంగానే లోకేశ్ బాలీవుడ్ ప్రముఖులను కలుస్తూ రాష్ట్రంలోని వనరులను, అవకాశాలను వారికి వివరిస్తున్నారు.