మైనర్ అక్కాచెల్లెళ్లపై అత్యాచారం.. జ్యోతిష్కుడికి 200 ఏళ్ల జైలు శిక్ష!

మైనర్ అక్కాచెల్లెళ్లపై లైంగిక దాడికి పాల్పడిన ఓ కామాంధుడి కేసులో న్యాయస్థానం సంచలన తీర్పు వెలువరించింది. నిందితుడికి ఏకంగా 200 ఏళ్ల కఠిన కారాగార శిక్ష విధిస్తూ తమిళనాడులోని శివగంగ పోక్సో ప్రత్యేక కోర్టు సోమవారం తీర్పు ఇచ్చింది. శివగంగ జిల్లాకు చెందిన 52 ఏళ్ల రామకృష్ణన్ జ్యోతిష్కుడు. 2021లో తన ఇద్దరు కుమార్తెలు (అప్పటికి 14, 17 ఏళ్ల వయసు) చదువుల్లో వెనుకబడ్డారని, వారికి పూజలు చేయించాలని వారి తల్లి రామకృష్ణన్‌ను ఆశ్రయించింది. ఇదే అదునుగా భావించిన నిందితుడు, పూజల పేరుతో బాలికలను తన ఇంటికి పిలిపించాడు. వారి తల్లిని ఓ గదిలో బంధించి, అక్కాచెల్లెళ్లపై అత్యాచారానికి ఒడిగట్టాడు. ఈ విషయం బయటకు చెబితే తల్లిదండ్రులు చనిపోతారని బెదిరించడంతో బాధితులు భయంతో మౌనంగా ఉండిపోయారు.

2023లో ఈ బాలికలు అస్వస్థతకు గురై ఆసుపత్రిలో చేరడంతో విషయాన్ని వైద్యులు వెలుగులోకి తెచ్చారు. వారిపై అత్యాచారం జరిగిందనీ, బాలికలకు హెచ్ఐవీ పాజిటివ్ కూడా వచ్చిందని పేర్కొన్నారు. దీంతో ఈ దారుణంపై తిరుపత్తూర్ మహిళా పోలీస్ స్టేషన్‌లో కేసు నమోదైంది. విచారణ జరిపిన పోలీసులు నిందితుడిని అరెస్ట్ చేసి జైలుకు పంపారు. ఈ కేసును విచారించిన శివగంగ పోక్సో ప్రత్యేక కోర్టు ఇన్‌ఛార్జ్ జడ్జి ఆర్.గోకుల్ మురుగన్, నిందితుడు రామకృష్ణన్‌ను దోషిగా తేల్చారు. ఇద్దరు బాధితులపై అఘాయిత్యానికి గానూ వేర్వేరు సెక్షన్ల కింద మొత్తం 200 ఏళ్ల కఠిన కారాగార శిక్ష విధించారు. దీంతోపాటు రూ.2 లక్షల జరిమానా కూడా వేశారు. బాధితులకు తలా రూ.10 లక్షల చొప్పున నష్టపరిహారం చెల్లించాలని తమిళనాడు ప్రభుత్వాన్ని కోర్టు ఆదేశించింది.

ఎస్సీ, ఎస్టీ చట్టం కింద నమోదైన ఆరోపణల నుంచి నిందితుడిని కోర్టు నిర్దోషిగా ప్రకటించినప్పటికీ, పోక్సో చట్టంలోని పలు కఠినమైన సెక్షన్ల కింద ఈ శిక్షను ఖరారు చేశారు.