మణిపురి సినిమా 'బూంగ్'కు 'బాఫ్టా' అవార్డు... ప్రధాని మోదీ స్పందన

భారతీయ ప్రాంతీయ సినిమా అంతర్జాతీయ వేదికపై సత్తా చాటింది. మణిపురి చిత్రం 'బూంగ్' ప్రతిష్ఠాత్మక 79వ బ్రిటిష్ అకాడమీ ఫిల్మ్ అవార్డ్స్ (బాఫ్టా)లో పురస్కారాన్ని గెలుచుకుంది. 'బెస్ట్ చిల్డ్రన్స్ అండ్ ఫ్యామిలీ ఫిల్మ్' కేటగిరీలో ఈ సినిమా విజేతగా నిలిచింది. ఈ అరుదైన ఘనత సాధించిన చిత్ర బృందాన్ని ప్రధానమంత్రి నరేంద్ర మోదీ అభినందించారు.

ఈ సందర్భంగా ప్రధాని మోదీ సోషల్ మీడియా ప్లాట్‌ఫామ్ 'ఎక్స్' వేదికగా స్పందించారు. "ఈ చిత్రంతో సంబంధం ఉన్న ప్రతి ఒక్కరికీ అభినందనలు. ఇది నిజంగా అపారమైన ఆనందాన్నిచ్చే క్షణం, ముఖ్యంగా మణిపూర్ ప్రజలకు. మన దేశంలోని అద్భుతమైన సృజనాత్మక ప్రతిభను ఈ విజయం చాటిచెబుతోంది" అని ఆయన తన పోస్టులో పేర్కొన్నారు. 'ఆర్కో', 'లిలో అండ్ స్టిచ్', 'జూట్రోపొలిస్ 2' వంటి అంతర్జాతీయ చిత్రాలతో పోటీపడి 'బూంగ్' ఈ అవార్డును దక్కించుకోవడం విశేషం.

మణిపూర్‌లోని సామాజిక ఉద్రిక్తతల నేపథ్యంలో, విడిపోయిన తన కుటుంబాన్ని తిరిగి కలపడానికి ఓ బాలుడు చేసే ప్రయాణమే ఈ చిత్ర కథాంశం. గుగున్ కిప్జెన్, బాలా హిజామ్, విక్రమ్ కొచ్చర్ తదితరులు కీలక పాత్రలు పోషించారు. ప్రముఖ నటుడు ఫర్హాన్ అక్తర్ ఈ చిత్రానికి సహ నిర్మాతగా వ్యవహరించారు.

ఈ అవార్డును స్వీకరించిన దర్శకురాలు లక్ష్మీప్రియా దేవి భావోద్వేగంగా ప్రసంగించారు. "ఎన్నో సమస్యలతో, సరైన ప్రాతినిధ్యం లేకుండా విస్మరించబడిన నా మాతృభూమి మణిపూర్‌కు ఈ చిత్రాన్ని అంకితమిస్తున్నాను. మణిపూర్‌లో తిరిగి శాంతి నెలకొనాలని ప్రార్థిస్తున్నాను" అని ఆమె పేర్కొన్నారు. ఈ సినిమా 2024 టొరంటో ఇంటర్నేషనల్ ఫిల్మ్ ఫెస్టివల్‌లో తొలిసారి ప్రదర్శితమైంది.