Chandrababu Naidu: రాబోయే రోజుల్లో కూటమి ప్రభుత్వం పెనుమార్పులు తీసుకురాబోతోంది: సీఎం చంద్రబాబు

పేద ప్రజల ఆదాయాన్ని పెంచి, వారి జీవితాల్లో ఆనందం నింపడమే తమ ప్రభుత్వ ధ్యేయమని ముఖ్యమంత్రి చంద్రబాబు నాయుడు స్పష్టం చేశారు. స్వచ్ఛతతోనే స్వర్ణాంధ్ర సాధ్యమవుతుందని, ప్రతి ఒక్కరూ ఈ కార్యక్రమంలో భాగస్వాములు కావాలని పిలుపునిచ్చారు. శనివారం పల్నాడు జిల్లా వినుకొండలో నిర్వహించిన "స్వచ్ఛాంధ్ర-స్వర్ణాంధ్ర" కార్యక్రమంలో ఆయన పాల్గొన్నారు. ఈ సందర్భంగా వ్యర్థాల సేకరణ కోసం వినియోగించే స్వచ్ఛ రథాలను ప్రారంభించారు.

పౌరుషాల గడ్డ పల్నాడులో స్వచ్ఛాంధ్ర కార్యక్రమం నిర్వహించడంపై సీఎం సంతోషం వ్యక్తం చేశారు. డిప్యూటీ సీఎం పవన్ కల్యాణ్, మంత్రి నారాయణ ఆధ్వర్యంలో రాష్ట్రవ్యాప్తంగా కార్యక్రమాలు బాగా జరుగుతున్నాయని ప్రశంసించారు. స్వచ్ఛత అనేది కేవలం రోడ్లు ఊడ్చే కార్యక్రమం కాదని, అది మన జీవన విధానంలో భాగం కావాలని ఉద్బోధించారు.

సంక్షేమంలో మనమే నంబర్ వన్
రాబోయే రోజుల్లో ఎన్డీఏ ప్రభుత్వం రాష్ట్రంలో పెనుమార్పులు తీసుకురాబోతోందని చంద్రబాబు తెలిపారు. ఇచ్చిన హామీ మేరకు సూపర్ సిక్స్ పథకాలను సూపర్ హిట్ చేశామన్నారు. ప్రతి నెలా ఒకటో తేదీనే పింఛన్లు అందిస్తున్నామని, ఇంత పెద్ద ఎత్తున సంక్షేమ కార్యక్రమాలు అమలు చేయడంలో దేశంలో ఏ రాష్ట్రమూ ఏపీకి దరిదాపుల్లో లేదని ధీమా వ్యక్తం చేశారు. తల్లికి వందనం, స్త్రీశక్తి, దీపం 2.0, అన్నదాత సుఖీభవ వంటి పథకాల ద్వారా ప్రజలకు అండగా నిలుస్తున్నామన్నారు. గేట్స్ ఫౌండేషన్ సహకారంతో 'సంజీవని' ప్రాజెక్టు ద్వారా పేదలకు మెరుగైన వైద్య సేవలు అందిస్తామని హామీ ఇచ్చారు.

మార్చి నెలాఖరుకు 100 శాతం చెత్త సేకరణ 
రాష్ట్రంలో పేరుకుపోయిన 108 లక్షల మెట్రిక్ టన్నుల చెత్త వల్ల భూగర్భ జలాలు కలుషితమయ్యే ప్రమాదం ఏర్పడిందని చంద్రబాబు ఆందోళన వ్యక్తం చేశారు. ఇప్పటికే 97 శాతం మున్సిపాలిటీల్లో ఇంటింటి నుంచి చెత్త సేకరణ జరుగుతోందని, వచ్చే మార్చి నెలాఖరు కల్లా రాష్ట్రంలోని అన్ని పంచాయతీల్లో 100 శాతం చెత్త సేకరణ పూర్తి చేస్తామని ప్రకటించారు. రాజమండ్రి, కర్నూలు, కడప, నెల్లూరులో రూ.1,254 కోట్లతో నిర్మిస్తున్న 'వేస్ట్ టు ఎనర్జీ ప్లాంట్ల'ను మార్చి 15 నాటికి వినియోగంలోకి తెస్తామన్నారు. రాష్ట్రంలో సింగిల్ యూజ్డ్ ప్లాస్టిక్‌ను నిషేధించామని, చెత్త నిర్వహణపై ప్రజల ఆలోచనా విధానంలో మార్పు రావాలని సూచించారు. జపాన్‌లో రోడ్లపై చిన్న కాగితం ముక్క కూడా కనిపించదని, అక్కడి పౌరుల తరహాలో మనమూ అలవాట్లు మార్చుకోవాలని కోరారు.

ఢిల్లీ ఏఐ సదస్సుపై కాంగ్రెస్ తీరు దారుణం
ఇటీవల ఢిల్లీలో ప్రధాని మోదీ ఆధ్వర్యంలో జరిగిన ఏఐ సదస్సు గురించి ప్రస్తావిస్తూ.. కాంగ్రెస్ పార్టీ తీరుపై సీఎం తీవ్రస్థాయిలో విమర్శలు చేశారు. "ప్రపంచంలోని పెద్ద కంపెనీలు, 60 దేశాల ప్రతినిధులు హాజరైన సదస్సులో.. యువత ప్రయోజనాలు కాపాడాల్సిన పార్టీలు అర్ధనగ్న ప్రదర్శనలు చేయడం నన్ను తీవ్రంగా బాధించింది. ఈ తరహా రాజకీయాలు దేశానికి నష్టం చేస్తాయి" అని ఆయన అన్నారు. గత ఐదేళ్ల పాలనలో రాష్ట్రాన్ని అప్పులపాలు చేశారని, పారిశ్రామికవేత్తలు పారిపోయారని ఆవేదన వ్యక్తం చేశారు. ప్రజలు ఆ అరాచక పాలనకు వ్యతిరేకంగా కూటమికి గొప్ప విజయాన్ని అందించారని తెలిపారు.

అభివృద్ధి, ఉపాధిపై ప్రత్యేక దృష్టి 
గతంలో తాను ఐటీకి ఇచ్చిన ప్రాధాన్యత వల్లే హైదరాబాద్ అభివృద్ధి చెందిందని గుర్తుచేశారు. ఇప్పుడు విశాఖలో గూగుల్ డేటా సెంటర్, అమరావతిలో క్వాంటమ్ వ్యాలీ ఏర్పాటు చేయబోతున్నామని వెల్లడించారు. మెగా డీఎస్సీ ద్వారా 15,600 ఉద్యోగాలు ఇచ్చామని, రోడ్ల మరమ్మతులు చేపడుతున్నామని, కరెంటు చార్జీలు పెంచబోమని స్పష్టం చేశారు. వినుకొండ నియోజకవర్గంలో 100 పడకల ఆస్పత్రిని 1000 పడకల ఆస్పత్రిగా అభివృద్ధి చేస్తామని, ట్రామా కేర్, డయాలసిస్ సెంటర్లు ఏర్పాటు చేస్తామని హామీ ఇచ్చారు. అగ్రికల్చర్, వెటర్నరీ కళాశాలల ఏర్పాటును పరిశీలిస్తామని, బస్టాండ్‌ను ఆధునీకరిస్తామని తెలిపారు. ఈ కార్యక్రమంలో మంత్రులు నారాయణ, గొట్టిపాటి రవికుమార్, స్వచ్ఛాంధ్ర కార్పొరేషన్ ఛైర్మన్ పట్టాభిరామ్, ఎమ్మెల్యే జీవీ ఆంజనేయులు పాల్గొన్నారు. అంతకుముందు సీఎం, ప్రభుత్వ శాఖలు ఏర్పాటు చేసిన స్టాళ్లను, డ్వాక్రా మహిళల ఉత్పత్తులను పరిశీలించి, పారిశుద్ధ్య కార్మికులను సన్మానించారు.