అమ్మకాల్లో దుమ్మురేపిన మహీంద్రా... జనవరిలో రికార్డు స్థాయి విక్రయాలు

ప్రముఖ ఆటోమొబైల్ తయారీ సంస్థ మహీంద్రా అండ్ మహీంద్రా (ఎం&ఎం) 2026 సంవత్సరాన్ని అమ్మకాల వృద్ధితో ఘనంగా ప్రారంభించింది. ఈ ఏడాది జనవరిలో ఎగుమతులతో కలిపి కంపెనీ మొత్తం 1,04,309 వాహనాలను విక్రయించింది. గతేడాది జనవరితో పోలిస్తే ఇది 24 శాతం అధికమని సంస్థ ఆదివారం ఒక ప్రకటనలో తెలిపింది.

వివరాల్లోకి వెళ్తే, స్పోర్ట్స్ యుటిలిటీ వెహికల్ (ఎస్‌యూవీ) సెగ్మెంట్‌లో కంపెనీ తన ఆధిపత్యాన్ని కొనసాగించింది. దేశీయంగా ఎస్‌యూవీ అమ్మకాలు 25 శాతం వృద్ధితో 63,510 యూనిట్లుగా నమోదయ్యాయి. అదే సమయంలో, వాణిజ్య వాహనాల విక్రయాలు 22 శాతం పెరిగి 27,656 యూనిట్లకు చేరుకున్నాయి. జనవరిలో ఎగుమతులు 5 శాతం వృద్ధితో 3,577 వాహనాలుగా ఉన్నాయి.

ఈ అమ్మకాలపై ఎం&ఎం ఆటోమోటివ్ డివిజన్ సీఈఓ నళినీకాంత్ గొల్లగుంట మాట్లాడుతూ.. "గత సంవత్సరం సాధించిన ఊపును కొనసాగిస్తూ ఈ ఏడాదిని బలంగా ప్రారంభించాం. జనవరి 14న ప్రారంభించిన ఎక్స్‌యూవీ7ఎక్స్ఓ, ఎక్స్‌ఈవీ 9ఎస్ మోడళ్లకు కేవలం 4 గంటల్లోనే రూ. 20,500 కోట్ల విలువైన 93,689 బుకింగ్స్ రావడం ఒక రికార్డు" అని వివరించారు.

ఇతర విభాగాల్లోనూ కంపెనీ మంచి పనితీరు కనబరిచింది. త్రీ-వీలర్ అమ్మకాలు 28 శాతం పెరిగి 9,566 యూనిట్లకు చేరాయి. తేలికపాటి వాణిజ్య వాహనాల (ఎల్‌సీవీ) విక్రయాలు కూడా 23 శాతం వృద్ధిని నమోదు చేశాయి. డిసెంబర్ 2025లో కూడా కంపెనీ రికార్డు స్థాయిలో అమ్మకాలు జరిపింది. ఈ గణాంకాలు తమ ఎస్‌యూవీ-ఆధారిత వ్యూహం విజయవంతం కావడానికి, కస్టమర్లలో పెరుగుతున్న విశ్వాసానికి నిదర్శనమని సంస్థ పేర్కొంది.