మెగాస్టార్ మార్కెట్ స్టామినా.. ఆరు రోజుల్లోనే ‘మన శంకర వరప్రసాద్ గారు’ బ్రేక్ ఈవెన్

మెగాస్టార్ చిరంజీవి బాక్సాఫీస్ స్టామినా ఏమాత్రం తగ్గలేదని మరోసారి నిరూపితమైంది. ఈ సంక్రాంతికి విడుదలైన ఆయన కొత్త చిత్రం ‘మన శంకర వరప్రసాద్ గారు (ఎంఎస్‌జీ)’ వసూళ్ల ప్రభంజనం సృష్టిస్తోంది. అనిల్ రావిపూడి దర్శకత్వంలో తెరకెక్కిన ఈ సినిమా, విడుదలైన కేవలం ఆరు రోజుల్లోనే ప్రపంచవ్యాప్తంగా రూ. 261 కోట్ల గ్రాస్ వసూలు చేసినట్లు చిత్ర యూనిట్ అధికారికంగా ప్రకటించింది. భారీ పోటీ నడుమ కూడా రోజురోజుకూ కలెక్షన్లు పెరుగుతుండటం ట్రేడ్ వర్గాలను ఆశ్చర్యపరుస్తోంది.

ఈ సినిమా సాధించిన మరో అరుదైన ఘనత, కేవలం ఆరు రోజుల్లోనే అన్ని ఏరియాల్లో బ్రేక్ ఈవెన్ పూర్తి చేసుకోవడం. భారీ బడ్జెట్ చిత్రాలు లాభాల బాట పట్టడానికి కనీసం రెండు వారాల సమయం పడుతుండగా, ‘ఎంఎస్‌జీ’ రికార్డ్ వేగంగా బయ్యర్లకు లాభాలు పంచిపెడుతోంది. పండగ సెలవులను పూర్తిగా సద్వినియోగం చేసుకున్న ఈ చిత్రం, చిరంజీవి కెరీర్‌లో ఒక మైలురాయిగా నిలిచిపోయింది.

దేశీయ మార్కెట్లోనే కాకుండా విదేశాల్లోనూ ఈ చిత్రానికి అద్భుతమైన స్పందన లభిస్తోంది. ముఖ్యంగా నార్త్ అమెరికాలో చిరంజీవి గత రికార్డులను అధిగమించి త్వరలోనే 3 మిలియన్ డాలర్ల మార్క్‌ను అందుకునే అవకాశం ఉందని ట్రేడ్ నిపుణులు అంచనా వేస్తున్నారు. ఆన్‌లైన్ టికెటింగ్ ప్లాట్‌ఫామ్‌లలో అడ్వాన్స్ బుకింగ్స్ ఇంకా బలంగానే కొనసాగుతున్నాయి. ఈ జోరు చూస్తుంటే రూ. 300 కోట్ల క్లబ్‌లో చేరడం ఖాయమని చిత్రబృందం ధీమా వ్యక్తం చేస్తోంది. 2026కు మెగాస్టార్ అదిరిపోయే ఆరంభాన్ని ఇచ్చారని సినీ విశ్లేషకులు అభిప్రాయపడుతున్నారు.