ఇన్సులిన్‌ను పెంచని 'సహజ చక్కెర'... శాస్త్రవేత్తల అద్భుత ఆవిష్కరణ

మధుమేహం, ఊబకాయం వంటి సమస్యలతో బాధపడుతున్న వారికి శాస్త్రవేత్తలు ఒక తీపి కబురు అందించారు. సాధారణ చక్కెర మాదిరిగానే రుచిగా ఉంటూ, రక్తంలో గ్లూకోజ్ లేదా ఇన్సులిన్ స్థాయిలను పెంచని ఒక సహజమైన చక్కెరను సులభంగా తయారు చేసే పద్ధతిని కనుగొన్నారు. 'టాగటోజ్' అని పిలిచే ఈ చక్కెర, ఆహార పరిశ్రమలో విప్లవాత్మక మార్పులు తీసుకురాగలదని నిపుణులు భావిస్తున్నారు.

ఏమిటీ టాగటోజ్ ప్రత్యేకత?
టాగటోజ్ అనేది పండ్లు, పాల ఉత్పత్తుల్లో చాలా స్వల్ప పరిమాణంలో లభించే ఒక సహజ చక్కెర. దీని రుచి మనం వాడే పంచదారకు దాదాపు 90 శాతం సమానంగా ఉంటుంది. కానీ, కేలరీల విషయంలో మాత్రం కేవలం 40 శాతం మాత్రమే కలిగి ఉంటుంది. ముఖ్యంగా, దీన్ని తీసుకున్న తర్వాత రక్తంలో చక్కెర స్థాయిలు ఒక్కసారిగా పెరగవు. దీంతోపాటు దంత క్షయానికి కూడా కారణం కాదు. ఈ లక్షణాలన్నీ టాగటోజ్ ను ఆరోగ్యకరమైన ప్రత్యామ్నాయంగా నిలుపుతున్నాయి.

తక్కువ ఖర్చుతో తయారీ
ఇన్ని ప్రయోజనాలు ఉన్నప్పటికీ, టాగటోజ్ ను సహజంగా వేరుచేయడం చాలా ఖరీదైన ప్రక్రియగా ఉండేది. అయితే, తాజా పరిశోధనలో శాస్త్రవేత్తలు ఈ సమస్యను అధిగమించారు. పాలలో ఉండే 'గెలాక్టోజ్' అనే చక్కెరను, కొన్ని ప్రత్యేక ఎంజైమ్‌ల సహాయంతో తక్కువ ఖర్చుతో టాగటోజ్ గా మార్చే విధానాన్ని అభివృద్ధి చేశారు. 

ఈ ఆవిష్కరణతో భవిష్యత్తులో ఈ ఆరోగ్యకరమైన చక్కెరను తక్కువ ధరకే మార్కెట్లోకి తెచ్చేందుకు మార్గం సుగమమైంది. ఈ నూతన ఆవిష్కరణ ఆహార, శీతల పానీయాల పరిశ్రమలపై గణనీయమైన ప్రభావాన్ని చూపే అవకాశం ఉంది. చక్కెర వాడకం వల్ల కలిగే ఆరోగ్య సమస్యలను నివారిస్తూనే, రుచిలో రాజీ పడకుండా తీపి పదార్థాలను ఆస్వాదించే వీలు కలుగుతుందని పరిశోధకులు ఆశాభావం వ్యక్తం చేస్తున్నారు.