డిసెంబర్ 25న ప్రపంచం అంతమవుతుందని చెప్పిన నకిలీ ప్రవక్త అరెస్ట్.. జోస్యం ఫలించకపోవడంతో వింత వాదన!

2025 డిసెంబర్ 25న ప్రపంచం మహా వరదలతో అంతమైపోతుందని చెప్పిన ఓ ప్రవక్త జోస్యం అట్టర్ ఫ్లాప్ అయింది. అయితే, తాను మూడు వారాల పాటు కఠిన ఉపవాసం ఉండి దేవుడిని ఒప్పించి యుగాంతాన్ని వాయిదా వేయించానని ఇప్పుడతడు కొత్త నాటకానికి తెరలేపాడు. ఈ వింత ప్రకటనలతో ప్రజలను తీవ్ర భయాందోళనలకు గురిచేశాడన్న ఆరోపణలపై ఘనా పోలీసులు ఎట్టకేలకు ఆ నకిలీ ప్రవక్తను అరెస్ట్ చేశారు. కొత్త ఏడాది వేడుకలకు ముందు రోజు, డిసెంబర్ 31న ఈ అరెస్ట్ జరిగింది.

ఘనా దేశానికి చెందిన 30 ఏళ్ల ఇవాన్స్ ఎషున్, తనను తాను 'ఇబో నోవా' లేదా 'ఇబో జీసస్'గా పిలుచుకుంటూ ప్రవక్తగా చలామణి అవుతున్నాడు. 2025 ఆగస్టులో ఇతను వెలుగులోకి వచ్చాడు. ప్రపంచాన్ని మూడేళ్ల పాటు ముంచెత్తే మహా వరదల నుంచి తన అనుచరులను కాపాడటానికి దేవుడు తనను ఆదేశించాడని నమ్మబలికాడు. ఇందుకోసం ఆధునిక 'ఓడలు' (arks) నిర్మిస్తున్నానని ప్రకటించాడు. దాదాపు 10 పడవలను నిర్మిస్తున్నట్టు వీడియోలలో చూపించాడు. అయితే, అవి సముద్ర తీరంలో ఉండే సాధారణ చేపల పడవలని ఆ తర్వాత తేలింది.

ఇతడి మాటలు నమ్మి ఘనాతో పాటు పొరుగు దేశాల నుంచి కూడా వందలాది మంది తమ ఆస్తులు అమ్ముకుని, ఇళ్లు వదిలేసి ఇతను చెప్పిన ఎల్మినా ప్రాంతానికి చేరుకున్నారు. అయితే, డిసెంబర్ 25న ఎలాంటి ప్రళయం రాకపోవడంతో అందరూ ఊపిరి పీల్చుకున్నారు. కానీ, ఇబో నోవా మాత్రం వెనక్కి తగ్గలేదు. తన ప్రార్థనల వల్లే దేవుడు మనసు మార్చుకుని విపత్తును వాయిదా వేశాడని ఓ వీడియో విడుదల చేశాడు.

అంతటితో ఆగకుండా, ప్రముఖ ర్యాపర్ సర్కోడీ నిర్వహించిన 'ర్యాపర్‌హోలిక్ 2025' సంగీత కచేరీ వేదికపై ప్రత్యక్షమై, "వేడుక చేసుకోండి, యుగాంతం వాయిదా పడింది" అని ప్రకటించడం తీవ్ర ఆగ్రహానికి కారణమైంది. ఈ ఘటన తర్వాత ప్రజల నుంచి ఫిర్యాదులు వెల్లువెత్తడంతో పోలీసులు రంగంలోకి దిగారు.

ప్రజల మధ్య భయాన్ని, ఆందోళనను సృష్టించే నకిలీ ప్రవచనాలను ఉపేక్షించబోమని ఘనా పోలీస్ ఇన్‌స్పెక్టర్ జనరల్ స్పెషల్ సైబర్ వెట్టింగ్ టీమ్ హెచ్చరించింది. ఈ క్రమంలో డిసెంబర్ 31న ఇబో నోవాను అదుపులోకి తీసుకుని కటకటాల వెనక్కి నెట్టింది.