కొత్త లేబర్ కోడ్స్: వేతనాల స్వరూపం మారనుంది!

దేశంలో కార్మిక చట్టాల సరళీకరణలో భాగంగా కేంద్ర ప్రభుత్వం కీలక ముందడుగు వేసింది. కొత్తగా రూపొందించిన నాలుగు లేబర్ కోడ్స్‌కు సంబంధించిన ముసాయిదా నిబంధనలను బుధవారం విడుదల చేసింది. 2026 ఏప్రిల్ 1 నుంచి ఈ కొత్త చట్టాలను పూర్తిస్థాయిలో అమలు చేయాలనే లక్ష్యంతో, ప్రజాభిప్రాయ సేకరణకు ఈ డ్రాఫ్ట్ రూల్స్‌ను అందుబాటులోకి తెచ్చింది.

ఈ కొత్త నిబంధనల్లో 'వేతనం' (Wage) నిర్వచనాన్ని స్పష్టంగా పేర్కొనడం అత్యంత కీలకాంశం. దీని ప్రకారం బేసిక్ పే, కరవు భత్యం (DA), రిటైనింగ్ అలవెన్స్ మాత్రమే వేతనంగా పరిగణిస్తారు. ఉద్యోగికి చెల్లించే మొత్తం వేతనంలో అలవెన్సులు 50 శాతానికి మించకూడదు. ఒకవేళ అలవెన్సులు 50 శాతం దాటితే, ఆ అదనపు మొత్తాన్ని కూడా వేతనంలో కలిపి దాని ఆధారంగానే ప్రావిడెంట్ ఫండ్ (PF), గ్రాట్యుటీ వంటివి లెక్కిస్తారు. ఈ మార్పుతో, కంపెనీలు తక్కువ బేసిక్ పే చూపిస్తూ పీఎఫ్, గ్రాట్యుటీలను తగ్గించేందుకు అవకాశం ఉండదు.

అయితే, పర్ఫార్మెన్స్ ఆధారిత ఇన్సెంటివ్స్, ఉద్యోగుల స్టాక్ ఆప్షన్స్ (ESOPs), వేరియబుల్ పే వంటివి ఈ 50 శాతం నిబంధన పరిధిలోకి రావని స్పష్టం చేశారు. గ్రాట్యుటీ నిబంధనల్లోనూ మార్పులు చేశారు. ఇకపై ఫిక్స్‌డ్ టర్మ్ కాంట్రాక్టు ఉద్యోగులకు కూడా ఏడాది సర్వీస్ పూర్తయితే గ్రాట్యుటీ వర్తిస్తుంది.

కేంద్ర కార్మిక మంత్రిత్వ శాఖ ఈ ముసాయిదా నిబంధనలపై అభిప్రాయాలు, సూచనలు స్వీకరించనుంది. ఇండస్ట్రియల్ రిలేషన్స్ కోడ్‌పై 30 రోజులు, మిగతా మూడు కోడ్‌లపై 45 రోజుల్లోగా అభిప్రాయాలు పంపవచ్చు. కార్మిక అంశం ఉమ్మడి జాబితాలో ఉన్నందున, రాష్ట్రాలు కూడా ఈ నిబంధనలను తమ పరిధిలో నోటిఫై చేయాల్సి ఉంటుంది.