కష్టకాలంలో ఆదుకున్నది ఆయనే.. వేణు స్వామిపై విష్ణు ప్రియ ప్రశంసలు

ప్రముఖ యాంకర్ విష్ణు ప్రియ తన వ్యక్తిగత జీవితం గురించి, ముఖ్యంగా వివాదాస్పద జ్యోతిష్యుడు వేణు స్వామి గురించి చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. ఓ ఇంటర్వ్యూలో మాట్లాడిన ఆమె, తన కష్టకాలంలో వేణు స్వామి చేసిన సహాయాన్ని గుర్తుచేసుకుని భావోద్వేగానికి గురయ్యారు. ఆయన వల్లే తన తల్లి ఎక్కువ రోజులు బ్రతకగలిగిందని ఆమె వెల్లడించారు.

తన తల్లి అనారోగ్యంతో ఆసుపత్రిలో ఉన్నప్పుడు బిల్లులు లక్షల్లో పెరిగిపోయాయని విష్ణు ప్రియ తెలిపారు. ఏం చేయాలో తెలియని నిస్సహాయ స్థితిలో వేణు స్వామికి ఫోన్ చేయగా, ఆయన వెంటనే స్పందించి డబ్బు సర్దుబాటు చేశారని చెప్పారు. "డాక్టర్లు మూడు రోజులే బతుకుతారని చెప్పినా, వేణు స్వామి చేసిన ఆ సహాయం వల్లే మా అమ్మ మరో ఏడాది పాటు జీవించారు. బయట ఆయన గురించి ఎవరు ఏమనుకున్నా, అవసరంలో ఉన్నవారిని ఆదుకునే మంచి మనసున్న వ్యక్తి ఆయన" అంటూ విష్ణు ప్రియ ప్రశంసలు కురిపించారు.

ఇదే ఇంటర్వ్యూలో ఆమె తన జీవితంలోని మరికొన్ని చీకటి కోణాలను కూడా పంచుకున్నారు. మార్ఫింగ్ వీడియోల వల్ల తీవ్ర అవమానానికి గురై, ఆ బాధ తట్టుకోలేక ఆత్మహత్య చేసుకోవాలనే ఆలోచనలు కూడా వచ్చాయని కన్నీటిపర్యంతమయ్యారు. అలాగే, ప్రేమ, పెళ్లి గురించి మాట్లాడుతూ తాను ఇష్టపడిన వ్యక్తి పెళ్లికి అంగీకరించకపోతే సన్యాసం తీసుకోవడానికైనా సిద్ధమేనని వ్యాఖ్యానించారు. 'పోవే పోరా', 'బిగ్ బాస్' వంటి షోలతో గుర్తింపు పొందిన విష్ణు ప్రియ చేసిన ఈ వ్యాఖ్యలు ఇప్పుడు చర్చనీయాంశంగా మారాయి.