ఇది తాత్కాలిక నిర్ణయం మాత్రమే... పైలట్ల నిబంధనలపై వెనక్కి తగ్గలేదు: కేంద్రం

విమాన పైలట్ల కోసం తీసుకొచ్చిన కొత్త విధి నిర్వహణ సమయ పరిమితుల (FDTL) నిబంధనలను పూర్తిగా నిలిపివేయలేదని, కేవలం ఇండిగో ఎయిర్‌లైన్స్‌కు చెందిన ఏ320 విమానాలకు మాత్రమే పరిమితమైన, తాత్కాలిక వెసులుబాట్లు కల్పించామని పౌర విమానయాన మంత్రిత్వ శాఖ స్పష్టం చేసింది. కొత్త నిబంధనల వల్ల విమాన షెడ్యూళ్లలో గందరగోళం నెలకొనడంతో, వాటిని సరిదిద్దేందుకే ఈ నిర్ణయం తీసుకున్నట్లు తెలిపింది.

శుక్రవారం మంత్రిత్వ శాఖ చేసిన ఓ ప్రకటనలో FDTL ఆదేశాలను తక్షణమే నిలిపివేస్తున్నట్లు పేర్కొనడంతో కొంత అపోహ నెలకొంది. అయితే, ఆ ప్రకటన వెలువడటానికి గంట ముందే డీజీసీఏ కేవలం ఇండిగో ఏ320 ఫ్లీట్‌కు మాత్రమే 2026 ఫిబ్రవరి 10 వరకు మినహాయింపులు ఇస్తూ ఉత్తర్వులు జారీ చేసిందని అధికారులు వివరించారు. నవంబర్ 1 నుంచి అమల్లోకి వచ్చిన ఈ కొత్త రూల్స్ కారణంగా విమానాలు భారీగా ఆలస్యం కావడం, రద్దు కావడంతో ఈ చర్యలు తీసుకున్నారు.

ఈ సడలింపులలో భాగంగా.. రాత్రి డ్యూటీ సమయాన్ని పాత పద్ధతి ప్రకారమే (రాత్రి 12 నుంచి ఉదయం 5 వరకు) పరిగణించడం, రాత్రి డ్యూటీలో ల్యాండింగ్‌ల సంఖ్యపై పరిమితిని మార్చడం వంటివి ఉన్నాయి.

అయితే, పైలట్ల డ్యూటీ గంటలు, విశ్రాంతి అవసరాలు, వారానికి తప్పనిసరిగా 48 గంటల విశ్రాంతి వంటి కీలకమైన భద్రతా నిబంధనలు యథాతథంగా కొనసాగుతాయని అధికారులు నొక్కిచెప్పారు. ఈ సడలింపులు ఇండిగోలోని ఇతర విమానాలకు గానీ, వేరే ఏ ఇతర ఎయిర్‌లైన్స్‌కు గానీ వర్తించవని స్పష్టం చేశారు. ప్రయాణికుల ఇబ్బందులను తగ్గించి, విమాన కార్యకలాపాల్లో స్థిరత్వాన్ని తీసుకురావడమే ఈ తాత్కాలిక చర్యల ముఖ్య ఉద్దేశమని వెల్లడించారు.