ఇండిగో విమానాలు రద్దు... కేంద్రం కొత్తగా నిర్ణయించిన టికెట్ రేట్లు ఇవే!

దేశీయ విమానయాన సంస్థ ఇండిగో సర్వీసులకు అంతరాయం కలగడంతో విపరీతంగా పెరిగిన విమాన టికెట్ల ధరలపై కేంద్ర ప్రభుత్వం తీవ్రంగా స్పందించింది. ప్రయాణికుల నుంచి వస్తున్న ఫిర్యాదుల నేపథ్యంలో రంగంలోకి దిగిన కేంద్ర పౌర విమానయాన శాఖ, విమాన ఛార్జీలపై గరిష్ఠ ధరల పరిమితి విధిస్తూ శనివారం కీలక ఆదేశాలు జారీ చేసింది.

ఇండిగో విమాన సర్వీసులు పెద్ద ఎత్తున రద్దు కావడంతో దేశవ్యాప్తంగా వేలాది మంది ప్రయాణికులు తీవ్ర ఇబ్బందులకు గురయ్యారు. ఇదే అదనుగా కొన్ని విమానయాన సంస్థలు టికెట్ల ధరలను అమాంతం పెంచేశాయి. సాధారణంగా రూ.5,000 నుంచి రూ.7,000 మధ్య ఉండే ఢిల్లీ-బెంగళూరు టికెట్ ధర ఏకంగా లక్ష రూపాయలకు చేరడంపై కేంద్రం సీరియస్ అయింది. ఈ సంక్షోభ సమయంలో విమానయాన సంస్థలు అవకాశవాదంగా వ్యవహరించకుండా నిరోధించేందుకు ఈ చర్యలు తీసుకున్నట్లు తెలిపింది.

కొత్త నిబంధనల ప్రకారం, ఎకానమీ క్లాస్ టికెట్లకు దూరాన్ని బట్టి గరిష్ఠ ధరలను ప్రభుత్వం నిర్ణయించింది.

* 500 కిలోమీటర్ల వరకు ప్రయాణానికి గరిష్ఠ ఛార్జీ రూ.7,500.
* 500 నుంచి 1,000 కిలోమీటర్ల మధ్య రూ.12,000.
* 1,000 నుంచి 1,500 కిలోమీటర్ల మధ్య రూ.15,000.
* 1,500 కిలోమీటర్లు దాటిన ప్రయాణాలకు గరిష్ఠంగా రూ.18,000గా నిర్ణయించారు.

పరిస్థితి చక్కబడే వరకు లేదా తదుపరి సమీక్ష వరకు ఈ ధరల పరిమితి అమలులో ఉంటుందని కేంద్రం స్పష్టం చేసింది. ఎయిర్‌లైన్ వెబ్‌సైట్లు, యాప్‌లు, థర్డ్-పార్టీ పోర్టల్స్ సహా అన్ని రకాల బుకింగ్‌లకు ఈ నిబంధన వర్తిస్తుంది. అధిక డిమాండ్ ఉన్న మార్గాల్లో అదనపు వనరులను కేటాయించాలని, అన్ని ధరల శ్రేణుల్లోనూ టికెట్లు అందుబాటులో ఉంచాలని విమానయాన సంస్థలను ప్రభుత్వం ఆదేశించింది.