రేపు రాత్రి 8 గంటల్లోగా ప్రయాణికులందరికీ రిఫండ్ లు చెల్లించాలి: ఇండిగోకు కేంద్రం డెడ్‌లైన్

విమానాల రద్దుతో ప్రయాణికులను తీవ్ర ఇబ్బందులకు గురిచేస్తున్న ఇండిగో ఎయిర్‌లైన్స్‌కు కేంద్ర ప్రభుత్వం గట్టి హెచ్చరికలు జారీ చేసింది. వరుసగా ఐదో రోజు కూడా ఇండిగో విమాన సర్వీసులకు అంతరాయం కలగడంతో, కేంద్ర పౌర విమానయాన మంత్రిత్వ శాఖ శనివారం కీలక ఆదేశాలు ఇచ్చింది. ఆదివారం (డిసెంబర్ 7) రాత్రి 8 గంటలలోపు పెండింగ్‌లో ఉన్న ప్రయాణికుల రిఫండ్‌లన్నీ పూర్తి చేయాలని స్పష్టం చేసింది.

విమానాల రద్దు కారణంగా శనివారం ఒక్కరోజే దేశవ్యాప్తంగా 405 డొమెస్టిక్ విమానాలు నిలిచిపోయాయి. ఈ నేపథ్యంలో స్పందించిన కేంద్రం, రద్దయిన విమానాల ప్రయాణికుల నుంచి రీషెడ్యూలింగ్ కోసం ఎలాంటి అదనపు ఛార్జీలు వసూలు చేయవద్దని ఎయిర్‌లైన్స్‌ను ఆదేశించింది. రిఫండ్‌ల జారీలో జాప్యం చేసినా లేదా నిబంధనలు ఉల్లంఘించినా తక్షణమే కఠిన చర్యలు తీసుకుంటామని మంత్రిత్వ శాఖ ఒక ప్రకటనలో హెచ్చరించింది.

అంతేకాకుండా, ప్రయాణికులకు దూరమైన లగేజీని 48 గంటల్లోగా గుర్తించి, వారి నివాసానికి లేదా వారు కోరుకున్న చిరునామాకు చేర్చాలని ఆదేశించింది. ప్రయాణికుల సమస్యల పరిష్కారానికి, రిఫండ్‌ల ప్రక్రియను వేగవంతం చేయడానికి ప్రత్యేకంగా సహాయక కేంద్రాలను ఏర్పాటు చేయాలని సూచించింది. ఈ కేంద్రాలు బాధితులైన ప్రయాణికులను స్వయంగా సంప్రదించి, వారికి ప్రత్యామ్నాయ ఏర్పాట్లు లేదా రిఫండ్‌లు అందేలా చూడాలని తెలిపింది.

పరిస్థితి చక్కబడే వరకు ఆటోమేటిక్ రిఫండ్ వ్యవస్థను కొనసాగించాలని ప్రభుత్వం స్పష్టం చేసింది. వృద్ధులు, దివ్యాంగులు, విద్యార్థులు, అత్యవసర ప్రయాణాలు చేసేవారికి ఎలాంటి ఇబ్బందులు కలగకుండా చూడాలని మంత్రిత్వ శాఖ పేర్కొంది. వీలైనంత త్వరగా విమాన కార్యకలాపాలను సాధారణ స్థితికి తీసుకురావడానికి కట్టుబడి ఉన్నామని తెలిపింది.