దేశంలో ఈఎంఐలు కడుతున్న వారి సంఖ్య ఎంతో తెలుసా?

దేశంలో ఈఎంఐలు లేదా ఏదో ఒక రకం రుణం కింద వాయిదాలు (ఈఎంఐ) చెల్లిస్తున్న వారి సంఖ్య ఎంతో తెలుసా? అక్షరాలా 28.3 కోట్లు. అంటే, దేశంలోని ప్రతి ఐదుగురిలో దాదాపు ఒకరు అప్పుల ఊబిలో ఉన్నారన్న మాట. తమ ఆకాంక్షలు నెరవేర్చుకోవడానికి, పెరుగుతున్న ఖర్చులను బట్టి చూస్తే భారతీయులు పెద్ద ఎత్తున రుణాలపై ఆధారపడుతున్నారని తాజా గణాంకాలు స్పష్టం చేస్తున్నాయి. గత ఏడేళ్లలో అప్పులు తీరుస్తున్న వారి సంఖ్య రెట్టింపునకు పైగా పెరగడం ఆందోళన కలిగిస్తోంది.

ఈ కీలక వివరాలను కేంద్ర ఆర్థిక శాఖ సహాయ మంత్రి పంకజ్ చౌదరి లోక్‌సభలో ఒక లిఖితపూర్వక సమాధానంలో వెల్లడించారు. ఆయన అందించిన సమాచారం ప్రకారం, 2017-18 ఆర్థిక సంవత్సరంలో దేశవ్యాప్తంగా అప్పులు చెల్లిస్తున్న వారి సంఖ్య 12.8 కోట్లుగా ఉండగా, 2024-25 నాటికి అది 28.3 కోట్లకు చేరింది. ఒక వ్యక్తి ఎన్ని రుణాలు తీసుకున్నా, అతన్ని ఒక్కరిగానే పరిగణించి ఈ లెక్కలు రూపొందించారు. అంటే, ప్రస్తుతం దేశంలో 28.3 కోట్ల మంది ప్రజలు ఏదో ఒక బ్యాంకుకో, ఆర్థిక సంస్థకో వాయిదాలు చెల్లిస్తున్నారు.

మరోవైపు, కుటుంబాల ఆర్థిక బాధ్యతల విలువ కూడా అసాధారణ స్థాయిలో పెరిగింది. 2015 ఆర్థిక సంవత్సరంలో రూ. 3.8 లక్షల కోట్లుగా ఉన్న ఈ భారం, 2024 నాటికి ఏకంగా రూ. 18.8 లక్షల కోట్లకు చేరింది. అయితే, 2025 ఆర్థిక సంవత్సరంలో ఇది కొంత తగ్గి రూ. 15.7 లక్షల కోట్లకు చేరవచ్చని అంచనా. దేశ జీడీపీతో పోల్చినా ఈ పెరుగుదల స్పష్టంగా కనిపిస్తోంది. 2015లో జీడీపీలో కుటుంబ రుణాల వాటా కేవలం 3 శాతంగా ఉండగా, 2024 నాటికి అది 6.2 శాతానికి పెరిగింది. 2025లో 4.7 శాతానికి తగ్గొచ్చని ఆర్‌బీఐ అంచనా వేస్తోంది.

ఈ క్రమంలో ఒక్కో రుణగ్రహీతపై సగటు అప్పు కూడా గణనీయంగా పెరిగింది. 2018లో సగటున ఒక్కొక్కరిపై రూ. 3.4 లక్షల అప్పు ఉండగా, 2025 నాటికి అది రూ. 4.8 లక్షలకు పెరిగింది. భారత ఆర్థిక వ్యవస్థ విస్తరిస్తున్న కొద్దీ, కుటుంబ రుణాలు వినియోగాన్ని పెంచి వృద్ధికి దోహదపడతాయని నిపుణులు అంటున్నారు. అయితే, ఇదే సమయంలో ప్రజల ఆదాయం అప్పులకు తగ్గట్టుగా పెరగకపోతే, ఇది ఆర్థిక వ్యవస్థకు పెను ప్రమాదంగా మారే అవకాశం ఉందని హెచ్చరిస్తున్నారు. అప్పుల వృద్ధి, ఆదాయ వృద్ధి మధ్య సమతుల్యం లోపిస్తే తీవ్ర పరిణామాలు తప్పవని వారు అభిప్రాయపడుతున్నారు.