ఏపీలో మరో బస్సు ప్రమాదం... కాలి బూడిదైన ఆర్టీసీ బస్సు

ఏపీలోని మన్యం జిల్లాలో పెను ప్రమాదం తప్పింది. ప్రయాణికులతో వెళ్తున్న ఓ ఆర్టీసీ బస్సులో అకస్మాత్తుగా మంటలు చెలరేగి పూర్తిగా దగ్ధమైంది. అయితే, డ్రైవర్ చాకచక్యంగా వ్యవహరించడంతో ప్రయాణికులందరూ సురక్షితంగా బయటపడ్డారు. ఈ ఘటనతో ప్రయాణికులు తీవ్ర భయాందోళనలకు గురయ్యారు.

వివరాల్లోకి వెళితే.. ఒడిశా రాష్ట్ర రోడ్డు రవాణా సంస్థకు (OSRTC) చెందిన బస్సు విశాఖపట్నం నుంచి జైపూర్‌కు బయలుదేరింది. మన్యం జిల్లా పార్వతీపురం సమీపంలోకి రాగానే బస్సు ఇంజిన్ భాగం నుంచి ఒక్కసారిగా మంటలు వ్యాపించాయి. దీన్ని వెంటనే గమనించిన డ్రైవర్, ఏమాత్రం ఆలస్యం చేయకుండా బస్సును రోడ్డు పక్కన నిలిపివేసి ప్రయాణికులను అప్రమత్తం చేశాడు. దీంతో వారంతా హుటాహుటిన బస్సు దిగిపోయారు.

ప్రయాణికులు కిందకు దిగిన కొన్ని క్షణాల్లోనే మంటలు బస్సు మొత్తానికి వ్యాపించి, చూస్తుండగానే కాలిబూడిదైంది. డ్రైవర్ సమయస్ఫూర్తితో వ్యవహరించడం వల్ల ఎలాంటి ప్రాణ నష్టం జరగకపోవడంతో ప్రయాణికులతో పాటు అధికారులు కూడా ఊపిరి పీల్చుకున్నారు.

గత కొంతకాలంగా తెలుగు రాష్ట్రాల్లో వరుస బస్సు ప్రమాదాలు ప్రజలను తీవ్ర ఆందోళనకు గురి చేస్తున్న విషయం తెలిసిందే. కర్నూలు, చేవెళ్ల వంటి ప్రాంతాల్లో జరిగిన ఘోర ప్రమాదాల్లో పదుల సంఖ్యలో ప్రయాణికులు ప్రాణాలు కోల్పోయారు. ఈ భయానక సంఘటనల నేపథ్యంలో, మన్యం జిల్లాలో ప్రాణ నష్టం జరగకపోవడం ఒకరకంగా ఊరటనిచ్చే అంశం. అగ్నిప్రమాదానికి గల కారణాలపై అధికారులు విచారణ చేపట్టారు.