కుటుంబంలో ఒకరిగా మారిన కాకి... నల్గొండ జిల్లాలో ఆసక్తికర ఘటన

మనిషికి, పక్షులకు మధ్య ఉండే అనుబంధాన్ని చాటిచెప్పే ఓ ఆసక్తికర ఘటన నల్గొండ జిల్లాలో వెలుగుచూసింది. ఓ కాకి అనారోగ్యం పాలవడంతో కుటుంబ సభ్యులు ఆందోళన చెంది, దానిని వెటర్నరీ ఆసుపత్రికి తీసుకెళ్లి చికిత్స చేయించారు. ఈ వింత సంఘటన దేవరకొండ పట్టణంలో చోటుచేసుకుంది.

వివరాల్లోకి వెళితే.. దేవరకొండ పట్టణానికి చెందిన షేక్ యూసుఫ్, సాఫియా దంపతుల కుటుంబంతో గత ఏడాదిగా ఓ కాకి కలిసి ఉంటోంది. అది ప్రతిరోజూ ఉదయాన్నే వారి ఇంటికి వస్తుంది. సాయంత్రం వరకు కుటుంబ సభ్యులతోనే కలిసిమెలిసి తిరుగుతూ ఉంటుంది. దీంతో ఆ కుటుంబం కూడా ఆ కాకిని తమలో ఒకరిగా భావించింది. వారు దానికి రోజూ అన్నం, చికెన్ వంటివి ఆహారంగా పెడుతూ అపురూపంగా చూసుకుంటున్నారు.

అయితే, గత రెండు రోజులుగా ఆ కాకి ఆహారం తీసుకోవడం మానేసింది. దీంతో యూసుఫ్ కుటుంబం తీవ్ర ఆందోళనకు గురైంది. దానికి ఏదో అనారోగ్యం చేసిందని భావించి, వెంటనే స్థానిక వెటర్నరీ ఆసుపత్రికి తీసుకెళ్లారు. అక్కడ వైద్యులు కాకిని జాగ్రత్తగా పరీక్షించి, అవసరమైన చికిత్స అందించారు.

ఒక కాకి కోసం కుటుంబం మొత్తం ఆసుపత్రికి రావడం చూసి స్థానికులు ఆశ్చర్యం వ్యక్తం చేస్తున్నారు. మూగజీవిపై వారు చూపిస్తున్న ప్రేమకు అభినందనలు తెలుపుతున్నారు. ఈ ఘటన జంతుప్రేమికులను ఎంతగానో ఆకట్టుకుంటోంది.