నీళ్లపై తేలుతుంటే చనిపోయాడేమో అనుకున్నారు.. కానీ!

సోషల్ మీడియాలో లైకులు, వ్యూస్ కోసం యువత ఎంతకైనా తెగిస్తోంది. వింత వింత విన్యాసాలు చేస్తూ ప్రాణాల మీదకు తెచ్చుకుంటున్న ఘటనలు రోజూ చూస్తూనే ఉన్నాం. తాజాగా మధ్యప్రదేశ్‌లో ఓ యువకుడు ఇన్‌స్టాగ్రామ్ రీల్ కోసం ఏకంగా చనిపోయినట్టు నటించి, స్థానికులతో పాటు పోలీసులను సైతం పరుగులు పెట్టించాడు. ఈ విచిత్ర ఘటన గ్వాలియర్‌లోని వీర్‌పూర్ డ్యామ్ వద్ద ఆదివారం చోటుచేసుకుంది.

వివరాల్లోకి వెళితే, ఆరోన్‌కు చెందిన టింకు సింగ్ (30) అనే యువకుడు ఓ ఇన్‌స్టాగ్రామ్ రీల్ చిత్రీకరించాలని నిర్ణయించుకున్నాడు. అందుకోసం వీర్‌పూర్ డ్యామ్ కాలువలో శవంలా తేలుతూ కనిపించాలని ప్లాన్ వేశాడు. అనుకున్నదే తడవుగా కాలువలోకి దిగి, ముఖం కొద్దిగా మాత్రమే నీటిపైకి కనిపించేలా సుమారు 20 నిమిషాల పాటు కదలకుండా ఉండిపోయాడు. అతడిని దూరం నుంచి చూసిన స్థానికులు, ఎవరో వ్యక్తి నీటిలో మునిగి చనిపోయాడని భావించారు. వెంటనే కొందరు వీడియోలు తీసి, "వీర్‌పూర్ డ్యామ్‌లో మరో మరణం" అంటూ సోషల్ మీడియాలో పోస్ట్ చేయడంతో అవి వైరల్ అయ్యాయి.

సమాచారం అందుకున్న గిర్వై పోలీసులు హుటాహుటిన ఘటనా స్థలానికి చేరుకున్నారు. మృతదేహాన్ని బయటకు తీసేందుకు సిద్ధమవుతుండగా, అప్పటివరకు శవంలా పడి ఉన్న టింకు సింగ్ ఒక్కసారిగా నీటిలో నుంచి లేచి గట్టుపైకి పరుగెత్తాడు. ఊహించని ఈ పరిణామానికి అక్కడున్న వారంతా ఒక్క క్షణం నివ్వెరపోయారు. వెంటనే తేరుకున్న పోలీసులు అతడిని వెంబడించి పట్టుకున్నారు.

విచారణలో టింకు అసలు విషయం చెప్పడంతో పోలీసులు అవాక్కయ్యారు. ఇన్‌స్టాగ్రామ్ రీల్ వాస్తవికంగా ఉండాలనే ఉద్దేశంతోనే చనిపోయినట్టు నటించానని ఒప్పుకున్నాడు. దీంతో పోలీసులు అతడికి గట్టిగా వార్నింగ్ ఇచ్చి, కౌన్సెలింగ్ నిర్వహించి కుటుంబ సభ్యులకు అప్పగించారు. "మొదట చనిపోయాడనుకున్నాం, తర్వాత దెయ్యమేమో అని భయపడ్డాం. తీరా చూస్తే రీల్ స్టార్ అని తెలిసి నవ్వొచ్చింది" అని ఓ స్థానికుడు వ్యాఖ్యానించాడు. ఈ ఘటనతో సోషల్ మీడియా మోజు ఎంత ప్రమాదకరంగా మారుతోందో మరోసారి స్పష్టమైంది.