మందు బాబులకు బిగ్ అలర్ట్.. హైదరాబాద్‌లో రెండు రోజులు వైన్స్ బంద్

గణేశ్ నిమజ్జన వేడుకలను పురస్కరించుకుని హైదరాబాద్ నగరంలో మద్యం అమ్మకాలపై ఆంక్షలు విధించారు. శాంతిభద్రతల పరిరక్షణలో భాగంగా రెండు రోజుల పాటు వైన్ షాపులు, బార్లు మూసివేయాలని ఎక్సైజ్ శాఖ ఉత్తర్వులు జారీ చేసింది.

ఈ నెల 6వ తేదీ ఉదయం 6 గంటల నుంచి 7వ తేదీ సాయంత్రం 6 గంటల వరకు నగర పరిధిలోని అన్ని మద్యం దుకాణాలు, బార్ అండ్ రెస్టారెంట్లు మూసి ఉంచాలని అధికారులు స్పష్టం చేశారు. అయితే, ఈ ఆంక్షల నుంచి స్టార్ హోటళ్లు, రిజిస్టర్డ్ క్లబ్‌లకు మినహాయింపు కల్పించినట్లు తెలిపారు. నిమజ్జనం ప్రశాంత వాతావరణంలో, ఎలాంటి అవాంఛనీయ ఘటనలు జరగకుండా చూసేందుకే ఈ నిర్ణయం తీసుకున్నట్లు అధికారులు వెల్లడించారు.

హైదరాబాద్‌లోనే కాకుండా రాష్ట్రంలోని పలు ఇతర జిల్లాల్లోనూ ఇదే తరహా నిబంధనలు అమలు చేస్తున్నారు. ఆదిలాబాద్ జిల్లాలో సెప్టెంబర్ 4 ఉదయం నుంచి 6వ తేదీ సాయంత్రం వరకు, పెద్దపల్లి వంటి మరికొన్ని జిల్లాల్లో 5వ తేదీన మద్యం దుకాణాలను మూసివేయాలని ఆయా జిల్లాల కలెక్టర్లు ఆదేశాలు ఇచ్చారు.

ముఖ్యంగా సెప్టెంబర్ 6న జరిగే ఖైరతాబాద్ బడా గణేశ్ నిమజ్జనం సహా, 6, 7 తేదీల్లో ట్యాంక్ బండ్ వద్ద భారీగా భక్తులు తరలిరానున్న నేపథ్యంలో ఈ జాగ్రత్తలు తీసుకుంటున్నారు. ఇదిలా ఉండగా, సెప్టెంబర్ 6న జరిగే గణేశ్ శోభాయాత్రలో కేంద్ర హోంమంత్రి అమిత్ షా పాల్గొననున్నారు. భాగ్యనగర్ ఉత్సవ సమితి ఆహ్వానం మేరకు ఆయన ఈ కార్యక్రమంలో పాలుపంచుకోనున్నారు. నిమజ్జన కార్యక్రమాన్ని సురక్షితంగా నిర్వహించేందుకు పోలీసులు, ఇతర ప్రభుత్వ శాఖలు పటిష్ట బందోబస్తు, ప్రత్యేక ఏర్పాట్లు చేస్తున్నాయి.