‘కూలీ’ నుంచి అదిరిపోయే అప్‌డేట్.. రజనీ ‘చికిటు’ పాట హల్‌చల్!

సూపర్‌స్టార్ రజనీకాంత్ కథానాయకుడిగా, ప్ర‌ముఖ‌ దర్శకుడు లోకేశ్‌ కనగరాజ్‌ దర్శకత్వంలో రూపుదిద్దుకుంటున్న చిత్రం ‘కూలీ’. భారీ అంచనాల నడుమ తెరకెక్కుతున్న ఈ సినిమా విడుదల తేదీ దగ్గర పడుతుండటంతో చిత్ర బృందం ప్రచార కార్యక్రమాలను వేగవంతం చేసింది. ఇందులో భాగంగా సినిమా నుంచి మొదటి పాట ‘చికిటు’ను గురువారం విడుదల చేశారు. ఈ పాట విడుదలైన అతి తక్కువ సమయంలోనే సంగీత ప్రియులను విశేషంగా ఆకట్టుకుంటూ, యూట్యూబ్‌లో లక్షల కొద్దీ వ్యూస్‌తో ట్రెండింగ్‌లో నిలిచింది.

యువ‌ సంగీత దర్శకుడు అనిరుధ్ రవిచందర్ స్వరపరిచిన ఈ ‘చికిటు’ పాటలో రజనీ తనదైన స్టైల్‌తో అభిమానులను ఉర్రూతలూగించారు. కేవలం రజనీ మాత్రమే కాకుండా సంగీత దర్శకుడు అనిరుధ్, సీనియర్ నటుడు టి. రాజేందర్ కూడా ఈ పాటలో స్టెప్పులేయడం విశేషం. వీరి ముగ్గురి కాంబినేషన్‌లో వచ్చిన ఈ పాట ప్రేక్షకులకు కనుల పండువ చేస్తోంది. అనిరుధ్ అందించిన మాస్ బీట్, రజనీ ఎనర్జీ పాటకు ప్రధాన ఆకర్షణగా నిలిచాయి. ఈ పాటను తమిళంతో పాటు తెలుగు, హిందీ భాషల్లోనూ ఏకకాలంలో విడుదల చేశారు. దీంతో అన్ని వర్గాల ప్రేక్షకుల నుంచి పాటకు అద్భుతమైన స్పందన లభిస్తోంది.

‘కూలీ’ చిత్రాన్ని అత్యంత ప్రతిష్ఠాత్మకంగా నిర్మిస్తున్నారు. ఈ సినిమాలో రజనీకాంత్‌తో పాటు బాలీవుడ్ స్టార్ ఆమిర్ ఖాన్, టాలీవుడ్ కింగ్ నాగార్జున, కన్నడ స్టార్ ఉపేంద్ర, నటి శ్రుతిహాసన్‌, సీనియర్ నటుడు స‌త్య‌రాజ్‌, మలయాళ నటుడు సౌబిన్ షాహిర్ వంటి భారీ తారాగణం నటిస్తుండటంతో సినిమాపై అంచనాలు మరింత పెరిగాయి. లోకేశ్‌ కనగరాజ్‌ మార్క్ యాక్షన్, రజనీకాంత్ స్టైల్ కలగలిసి ఈ సినిమా ఓ సరికొత్త అనుభూతిని అందిస్తుందని అభిమానులు ఆశిస్తున్నారు.

ప్రస్తుతం శరవేగంగా ప్రచార కార్యక్రమాలు జరుపుకుంటున్న ఈ చిత్రం ఆగస్టు 14వ తేదీన ప్రపంచవ్యాప్తంగా ప్రేక్షకుల ముందుకు రానుంది. ‘చికిటు’ పాటతో మొదలైన ప్రమోషన్ల జోరు, సినిమా విడుదలయ్యే వరకు కొనసాగుతుందని చిత్ర యూనిట్ వర్గాలు తెలిపాయి. ఈ పాట సృష్టిస్తున్న హంగామా చూస్తుంటే, ‘కూలీ’ బాక్సాఫీస్ వద్ద కూడా రికార్డులు సృష్టించడం ఖాయమని సినీ విశ్లేషకులు అభిప్రాయపడుతున్నారు.