ద్వాదశ జ్యోతిర్లింగాల యాత్ర పూర్తి.. మంచు విష్ణు ఆస‌క్తిక‌ర పోస్ట్

టాలీవుడ్‌ నటుడు మంచు విష్ణు తన ఆధ్యాత్మిక ప్రయాణంలో ఒక కీలకమైన మైలురాయిని చేరుకున్నారు. దేశవ్యాప్తంగా ఉన్న పన్నెండు జ్యోతిర్లింగాల దర్శనాన్ని ఆయన పూర్తి చేశారు. ఈ పవిత్ర యాత్రలో భాగంగా చివరి జ్యోతిర్లింగమైన శ్రీశైలం మల్లికార్జున స్వామి వారిని దర్శించుకున్నట్లు విష్ణు స్వయంగా తెలిపారు. ఈ దర్శనంతో తన ద్వాదశ జ్యోతిర్లింగాల యాత్ర దైవికంగా ముగిసిందని ఆయన పేర్కొన్నారు.

ఈ మేర‌కు ఎక్స్ (ట్విట్ట‌ర్) వేదిక‌గా ఆస‌క్తిక‌ర పోస్ట్ పెట్టారు. "శ్రీశైలం మల్లికార్జున స్వామి వారి దర్శనంతో నా పన్నెండు జ్యోతిర్లింగాల యాత్ర పూర్తయింది. నా మనసు ఇప్పుడు ప్రశాంతత, కృతజ్ఞత, సానుకూల దృక్పథంతో నిండిపోయింది. ఆత్మకు ఎంతో ఆశీర్వాదం లభించినట్లు అనిపిస్తోంది" అని తన అనుభూతిని పంచుకున్నారు. జీవితంలో ఈ ఆధ్యాత్మిక ఘట్టం తనకు ఎంతో ముఖ్యమైనదని ఆయన అన్నారు.

ఈ ఆధ్యాత్మిక ప్రశాంతత నడుమ, తన తదుపరి చిత్రం 'కన్నప్ప' విడుదల కోసం ఎదురుచూస్తున్నట్లు విష్ణు తెలిపారు. ఈ సినిమా జూన్ 27న ప్రపంచవ్యాప్తంగా ప్రేక్షకుల ముందుకు రానుంది. 'కన్నప్ప' తనకు ఎంతో ఇష్టమైన చిత్రమని, తాను ప్రస్తుతం పొందుతున్న ఆధ్యాత్మిక స్ఫూర్తిని ఈ సినిమా ప్రతిబింబిస్తుందని ఆయన వివరించారు. ఇక‌, విష్ణు ప్రస్తుతం 'కన్నప్ప' ప్రచార కార్యక్రమాల్లో చురుగ్గా పాల్గొంటున్న విష‌యం తెలిసిందే.