పూరి జగన్నాథ్, విజయ్ సేతుపతి ‘స్లమ్‌డాగ్’ షూటింగ్ పూర్తి

డాషింగ్ డైరెక్టర్ పూరి జగన్నాథ్, మక్కల్ సెల్వన్ విజయ్ సేతుపతి కాంబినేషన్‌లో వస్తున్న పాన్-ఇండియా చిత్రం ‘స్లమ్‌డాగ్ – 33 టెంపుల్ రోడ్’. ఈ సినిమా షూటింగ్ మొత్తం పూర్తయినట్లు చిత్రబృందం అధికారికంగా ప్రకటించింది. ఈ మేరకు సోషల్ మీడియా ద్వారా వివరాలు వెల్లడించింది.

పూరి కనెక్ట్స్, జేబీ మోషన్ పిక్చర్స్ బ్యానర్లపై పూరి జగన్నాథ్, చార్మి కౌర్ ఈ చిత్రాన్ని నిర్మిస్తున్నారు. సినిమా చిత్రీకరణ మొత్తం పూర్తయిందని, ప్రేక్షకులను థియేటర్లలో ఒక ఎమోషనల్ రోలర్‌కోస్టర్ రైడ్‌కు తీసుకెళ్లేందుకు సిద్ధంగా ఉన్నామని మేకర్స్ తెలిపారు. ప్రస్తుతం పోస్ట్ ప్రొడక్షన్ పనులు వేగంగా జరుగుతున్నాయని, త్వరలోనే సినిమా విడుదల తేదీని ప్రకటిస్తామని స్పష్టం చేశారు.

నిజ జీవిత ఘటనల ఆధారంగా తెరకెక్కుతున్న ఈ యాక్షన్ ఎంటర్‌టైనర్‌లో విజయ్ సేతుపతి ఒక విభిన్నమైన పాత్రలో కనిపించనున్నారు. ఈ చిత్రంలో సీనియర్ నటి టబు, జరీనా వహాబ్, సంయుక్త మీనన్ కీలక పాత్రలు పోషిస్తున్నారు. ‘యానిమల్’ ఫేమ్ హర్షవర్ధన్ రామేశ్వర్ ఈ చిత్రానికి సంగీతం అందిస్తున్నారు. తెలుగు, తమిళం, హిందీ, కన్నడ, మలయాళ భాషల్లో ఈ సినిమాను గ్రాండ్‌గా రిలీజ్ చేసేందుకు సన్నాహాలు చేస్తున్నారు. పూరి, విజయ్ సేతుపతి కలయికలో వస్తున్న సినిమా కావడంతో దీనిపై భారీ అంచనాలు నెలకొన్నాయి.