అమెరికాలో నీతా అంబానీ భారీ ఈవెంట్

భారతీయ సంస్కృతి, కళలు, వారసత్వ వైభవాన్ని ప్రపంచ వేదికపై ప్రదర్శించేందుకు నీతా అంబానీ కల్చరల్ సెంటర్ (ఎన్ఎంఏసీసీ) సిద్ధమైంది. ఈ ఏడాది సెప్టెంబర్ 12 నుంచి 14 వరకు న్యూయార్క్ నగరంలోని ప్రఖ్యాత లింకన్ సెంటర్‌లో మూడు రోజుల పాటు 'ఇండియా వీకెండ్' పేరిట ప్రత్యేక కార్యక్రమాలు నిర్వహించనున్నట్లు రిలయన్స్ ఫౌండేషన్ ఛైర్‌పర్సన్ నీతా అంబానీ సోమవారం ఒక వీడియో సందేశంలో తెలిపారు.

ఈ అంతర్జాతీయ ప్రదర్శన ద్వారా భారతదేశపు ఆత్మను దాని పూర్తి వైభవంతో ప్రపంచానికి పరిచయం చేస్తామని నీతా అంబానీ పేర్కొన్నారు. "మా సంస్కృతి, కళలు, చేతివృత్తులు, సంగీత నృత్యాలు, ఫ్యాషన్, భారతీయ వంటకాలను ఈ వేదికపై ప్రదర్శిస్తాం. న్యూయార్క్‌లో జరిగే ఈ కార్యక్రమం, భారతీయ సాంస్కృతిక వాణిని ప్రపంచ ప్రేక్షకులకు వినిపించడమే కాకుండా, మన దేశంలోని అత్యుత్తమమైన వాటిని ప్రపంచానికి అందించే ఒక ప్రయత్నం" అని ఆమె వివరించారు. ఈ అపురూప అనుభూతిని ఆస్వాదించడానికి ప్రతి ఒక్కరూ తరలిరావాలని ఆమె ఆహ్వానించారు.

ఈ వేడుకల్లో భాగంగా, భారతదేశపు అతిపెద్ద థియేటర్ ప్రొడక్షన్ అయిన 'ది గ్రేట్ ఇండియన్ మ్యూజికల్: సివిలైజేషన్ టు నేషన్' అమెరికాలో తొలిసారిగా ప్రదర్శితం కానుంది. డేవిడ్ హెచ్ కోచ్ థియేటర్‌లో జరిగే ఈ ప్రదర్శన, క్రీస్తుపూర్వం 5000 సంవత్సరం నుంచి 1947 స్వాతంత్ర్యం వరకు భారతీయ నాగరికత ప్రస్థానాన్ని నృత్యం, కళ, ఫ్యాషన్, సంగీతం ద్వారా కళ్ళకు కడుతుంది. 100 మందికి పైగా కళాకారులు, అద్భుతమైన కాస్ట్యూమ్స్, భారీ సెట్టింగ్‌లతో ఈ కార్యక్రమం రూపుదిద్దుకుంది. దీనికి ఫిరోజ్ అబ్బాస్ ఖాన్ దర్శకత్వం వహించగా, అజయ్-అతుల్ సంగీతం, ప్రముఖ కొరియోగ్రాఫర్లు వైభవి మర్చంట్, మయూరి ఉపాధ్యాయ, సమీర్, అర్ష్ తన్నాలు నృత్యరీతులు సమకూర్చారు. ప్రముఖ ఫ్యాషన్ డిజైనర్ మనీష్ మల్హోత్రా కాస్ట్యూమ్స్ రూపొందించారు.

సెప్టెంబర్ 12న జరిగే ప్రారంభోత్సవంలో మనీష్ మల్హోత్రా ఆధ్వర్యంలో 'స్వదేశ్ ఫ్యాషన్ షో' కూడా ఉంటుంది. ఇందులో భారతీయ సంప్రదాయ వస్త్రాలు, చేనేత కళాకారుల నైపుణ్యం ప్రదర్శితమవుతాయి. అలాగే, మిషెలిన్ స్టార్ చెఫ్ వికాస్ ఖన్నా ఆధ్వర్యంలో ప్రాచీన, ఆధునిక భారతీయ వంటకాల రుచులను అతిథులకు అందిస్తారు. డామ్‌రోష్ పార్క్‌లో 'గ్రేట్ ఇండియన్ బజార్' పేరుతో భారతీయ ఫ్యాషన్, వస్త్రాలు, ఆహార పదార్థాలు, నృత్యం, యోగా, సంగీత అనుభవాలను అందించే స్టాల్స్ ఏర్పాటు చేయనున్నారు.