మహానాడు వేదికగా తండ్రిని గుర్తు చేసుకున్న కేంద్రమంత్రి రామ్మోహన్ నాయుడు

కడపలో జరుగుతున్న తెలుగుదేశం పార్టీ మహానాడు వేదికపై కేంద్ర విమానయాన శాఖ మంత్రి కింజరాపు రామ్మోహన్ నాయుడు రాజకీయ తీర్మానం ప్రవేశపెట్టి ప్రసంగించారు. ప్రతి మహానాడులో ఆఖరి తీర్మానంగా దీనిని ప్రవేశపెడతామని, గతంలో తన తండ్రి, టీడీపీ సీనియర్ నేత కింజరాపు ఎర్రన్నాయుడు ఇదే రాజకీయ తీర్మానాన్ని ప్రవేశపెట్టేవారని గుర్తుచేసుకున్నారు. ఆయన అడుగుజాడల్లో ఈ అవకాశం తనకు కల్పించినందుకు టీడీపీ అధినేత చంద్రబాబుకు ప్రత్యేక ధన్యవాదాలు తెలిపారు.

ఉగ్రవాదంపై ఉక్కుపాదం, దేశభక్తి మన విధానం

పహల్గాం సంఘటన ప్రతి భారతీయుడినీ కలచివేసిందని, ఆ ఘటనలో 26 మంది మరణించగా, వారిలో ఇద్దరు తెలుగువారు ఉండటం బాధాకరమని రామ్మోహన్ నాయుడు అన్నారు. ప్రధాని నరేంద్ర మోదీ దృఢ నిశ్చయంతో "ఆపరేషన్ సింధూర్" ద్వారా ఉగ్రవాదులకు తగిన బుద్ధి చెప్పారని, 81 మంది ఉగ్రవాదులను హతమార్చిన ఘనత భారత సైన్యానిదని, ప్రధాని మోదీదని కొనియాడారు. "ఆపరేషన్ సింధూర్ ఇంకా ముగిసిపోలేదని, శాంతిని ప్రేమించే భారతదేశంలో అశాంతి సృష్టించాలని చూస్తే అదే వారికి చివరి రోజవుతుందని" ఉగ్రవాదులకు, వారిని ప్రోత్సహించే దేశాలకు స్పష్టమైన సందేశం ఇచ్చారు. టీడీపీ ప్రాంతీయ పార్టీగా ఆవిర్భవించినప్పటికీ, దేశభక్తితో పనిచేసిందని, రాష్ట్రానికి, దేశానికి ఉన్న సత్సంబంధాలను గౌరవించిందని తెలిపారు.

కేంద్రంలో టీడీపీ కీలక పాత్ర, రాష్ట్ర ప్రయోజనాలే లక్ష్యం

ఎన్టీఆర్ నుంచి చంద్రబాబు వరకు ఎన్నో కూటములను కేంద్రంలో నడిపిన ఘనత టీడీపీదని రామ్మోహన్ నాయుడు పేర్కొన్నారు. ప్రాంతీయ పార్టీ నాయకుడిని ప్రధాని చేయాలన్నా, ముస్లిం వ్యక్తిని రాష్ట్రపతి చేయాలన్నా, దళిత వ్యక్తిని లోక్‌సభ స్పీకర్‌గా చేయాలన్నా ఆ ఘనత టీడీపీకే దక్కిందన్నారు. 43 ఏళ్లుగా కేంద్ర ప్రభుత్వంతో రాష్ట్రం అనుసంధానంగా ముందుకు వెళ్తోందని, ప్రస్తుతం టీడీపీ, బీజేపీ, జనసేన కలిసికట్టుగా రాష్ట్ర ప్రయోజనాలు, దేశ సమగ్రత కోసం పనిచేస్తున్నాయని వివరించారు. చంద్రబాబు, పవన్ కల్యాణ్, ప్రధాని నరేంద్ర మోదీ నాయకత్వంలో రాష్ట్రంలో, దేశంలో ఆటంకాలు లేని కూటమి పాలన సాగుతోందన్నారు. విశాఖ స్టీల్ ప్లాంట్, రైల్వే జోన్, పోలవరం, అమరావతి వంటి కీలక అంశాలను కేంద్రం ద్వారా ఏడాదిలోపే సాధించామని ఆయన తెలిపారు.

దేశం రేపు ఆలోచించేది చంద్రబాబు ఇవాళే ఆలోచిస్తారు

తెలుగువారి ఆత్మగౌరవం కోసం, పేదలు, బడుగు బలహీన వర్గాలు, కార్మికులు, మహిళలు, వెనుకబడిన వర్గాల కోసం టీడీపీ ఆవిర్భవించిందని రామ్మోహన్ నాయుడు అన్నారు. ఎన్టీఆర్ యువతను ప్రోత్సహిస్తే, నేడు చంద్రబాబు అదే మూల సిద్ధాంతంతో పార్టీలో యువతకు అత్యధిక ప్రాధాన్యత ఇస్తున్నారని తెలిపారు. చంద్రబాబు ప్రపంచంలోని వినూత్న విధివిధానాలతో రాష్ట్రాన్ని ముందుకు నడిపిస్తున్నారని, "వాట్ సీబీఎన్ థింక్స్ టుడే... ఇండియా థింక్స్ టుమారో" అనేది నినాదంగా మారిందని కొనియాడారు. చంద్రబాబు పాలనలో ప్రజల వద్దకే పాలన, జన్మభూమి, డ్వాక్రా సంఘాలు, ఐటీ, జీనోమ్ వ్యాలీ వంటివి రూపుదిద్దుకున్నాయని, ఆయన ఏర్పాటు చేసిన జీనోమ్ వ్యాలీనే కోవిడ్ వ్యాక్సిన్ కనుగొనడంలో కీలక పాత్ర పోషించిందని అన్నారు. 

దేశంలో విమానాశ్రయాల నిర్మాణంలో పీపీపీ విధానాన్ని, అమరావతి నిర్మాణానికి ల్యాండ్ పూలింగ్ విధానాన్ని ప్రవేశపెట్టి చంద్రబాబు ప్రపంచానికే ఆదర్శంగా నిలిచారని ప్రశంసించారు. నదుల అనుసంధానం ఆయన జీవితాశయమని, వాజ్‌పేయి హయాంలో ప్రయత్నించి, నేడు మోదీకి ఆ విధానాన్ని చూపించడంతో ఆ కల సాకారం కాబోతోందని తెలిపారు.

గత ప్రభుత్వ వైఫల్యాలపై విమర్శలు

గత ఐదేళ్ల జగన్ రెడ్డి పాలనలో రాష్ట్ర ప్రజలు నరకం చూశారని రామ్మోహన్ నాయుడు తీవ్రస్థాయిలో విమర్శించారు. ప్రజావేదిక కూల్చివేతతో మొదలుపెట్టి, మూడు రాజధానుల మాయతో ప్రజలను మోసం చేశారని ఆరోపించారు. ప్రశ్నించిన వారిని అంతమొందించారని, "బాదుడే బాదుడు"తో ప్రజలపై భారాలు మోపారని, దళితులను ఇళ్లకే పరిమితం చేసి హత్యలు చేశారని ఆరోపించారు. అసెంబ్లీని బూతులకు వేదికగా మార్చారని, కేంద్ర నిధులు, ల్యాండ్, శాండ్, మైనింగ్, గిరిజన నిధుల్లో దోపిడీ చేశారని, కల్తీ మద్యం ద్వారా వేల కుటుంబాలను రోడ్డున పడేశారని ధ్వజమెత్తారు. చంద్రబాబుపై అక్రమ కేసు పెట్టి 56 రోజులు జైల్లో పెట్టడం జగన్ చేసిన పెద్ద తప్పని, ఆ చర్యతోనే ఆయన పతనం ప్రారంభమైందని అన్నారు. 

లోకేశ్ యువగళం, యువతకు ప్రాధాన్యం

టీడీపీ చరిత్ర మరో 40 ఏళ్లు కొనసాగాలన్నది నారా లోకేశ్ ఆలోచన అని రామ్మోహన్ నాయుడు అన్నారు. యువత భయంతో బయటకు రాని పరిస్థితుల్లో, లోకేశ్ "యువగళం" పేరుతో పాదయాత్ర చేపట్టి, ఎన్ని అడ్డంకులు ఎదురైనా వెనకడుగు వేయకుండా 3000 కిలోమీటర్లు పూర్తిచేశారని, ఇది దేశ చరిత్రలో యువతకు సరికొత్త స్ఫూర్తినిచ్చిందని కొనియాడారు. "ప్రజలకు నచ్చిన నాయకుడు, ప్రధాని మెచ్చిన నాయకుడు మన లోకేశ్ గారని, మంగళగిరిలో ఓడిపోయినా, పారిపోయే తత్వం తమది కాదని అక్కడే పోటీ చేసి 91,413 ఓట్ల భారీ మెజారిటీతో గెలిచారని" తెలిపారు. పార్టీలో 60 మందికి పైగా యువ ఎమ్మెల్యేలను చంద్రబాబు తయారుచేశారని, పార్లమెంట్‌లోనూ టీడీపీ యంగెస్ట్ పార్టీ అని, యువతను రాజకీయాల్లోకి ఎలా తీసుకురావాలో ఇతర పార్టీలకు టీడీపీ ఆదర్శంగా నిలుస్తోందన్నారు.

కోటి సభ్యత్వాలను 45 రోజుల్లో పూర్తిచేయడం లోకేశ్ నాయకత్వ పటిమకు నిదర్శనమని పేర్కొన్నారు. లోకేశ్ ప్రతిపాదించిన "ఆరు శాసనాలను" ప్రజల్లోకి తీసుకువెళ్లి, మరో 40 ఏళ్లు పార్టీని ముందుకు నడిపించేందుకు ప్రతిఒక్కరూ కృషి చేయాలని పిలుపునిచ్చారు.

చివరగా, తనకు కేంద్ర మంత్రి పదవి ఇచ్చినందుకు, మహానాడులో రాజకీయ తీర్మానం ప్రవేశపెట్టే అవకాశం కల్పించినందుకు చంద్రబాబు నాయుడుకు రామ్మోహన్ నాయుడు ధన్యవాదాలు తెలిపారు. సూర్యచంద్రులు ఉన్నంత కాలం టీడీపీ ఉంటుందని ధీమా వ్యక్తం చేశారు.