Benjamin Netanyahu: గాజాలో హమాస్‌కు మరో దెబ్బ: కీలక కమాండర్‌ను హతమార్చినట్లు నెతన్యాహూ ప్రకటన

హమాస్ సాయుధ బృందానికి చెందిన గాజా చీఫ్ ముహమ్మద్ సిన్వార్‌ను తమ సైన్యం హతమార్చినట్లు ఇజ్రాయెల్ ప్రధానమంత్రి బెంజమిన్ నెతన్యాహు బుధవారం ప్రకటించారు. ఇజ్రాయెల్ పార్లమెంట్ అయిన క్నెసెట్‌లో ప్రసంగిస్తూ ఆయన ఈ విషయాన్ని అధికారికంగా వెల్లడించారు. "మేము ముహమ్మద్ సిన్వార్‌ను మట్టుబెట్టాం" అని ఆయన స్పష్టం చేశారు.

ఈ నెల మే 14న ఇజ్రాయెల్ జరిపిన ఒక భారీ వైమానిక దాడిలో ముహమ్మద్ సిన్వార్ తీవ్రంగా గాయపడినట్లు అప్పట్లో వార్తలు వచ్చాయి. అయితే, ఆ దాడిలో అతను మరణించాడా లేదా అనే విషయాన్ని ఇజ్రాయెల్ రక్షణ దళాలు వెంటనే ధృవీకరించలేకపోయాయి. ఖాన్ యూనిస్‌లోని యూరోపియన్ హాస్పిటల్ కింద హమాస్ ఉపయోగించుకుంటున్న ఒక భూగర్భ కమాండ్ సెంటర్‌పై మే 14న ఇజ్రాయెల్ దళాలు కచ్చితమైన డ్రోన్ దాడి జరిపాయి. ఈ దాడిలోనే ముహమ్మద్ సిన్వార్ గాయపడినట్లు తెలిసింది.

ముహమ్మద్ సిన్వార్, గాజాలో మిగిలి ఉన్న హమాస్ అగ్రశ్రేణి కమాండర్లలో ఒకరిగా భావిస్తున్నారు. ఇతను గత ఏడాది అక్టోబర్‌లో ఇజ్రాయెల్ సైన్యంతో జరిగిన ఘర్షణలో మరణించిన హమాస్ మాజీ చీఫ్ యాహ్యా సిన్వార్ సోదరుడు.

యూరోపియన్ హాస్పిటల్ కింద ఉన్న సొరంగం ద్వారా హమాస్ స్థావరానికి దారితీస్తున్న దృశ్యాలతో కూడిన ఒక వీడియోను కూడా ఇజ్రాయెల్ సైన్యం గతంలో విడుదల చేసింది. ఈ రహస్య స్థావరం నుంచే హమాస్ కార్యకలాపాలు నిర్వహిస్తోందని ఇజ్రాయెల్ ఆరోపించింది.