మద్యం విషయంలో 3 అపోహలు గురించి తెలుసుకోండి!

మద్యపానం చాలామందికి సాధారణ అలవాటు. అయితే, ఆల్కహాల్ గురించి అనేక అపోహలు కూడా ప్రచారంలో ఉన్నాయి. వైన్ గుండెకు చాలా మంచిదని, వోడ్కా తాగడం వల్ల పెద్దగా సమస్యలు రావని కొందరు నమ్ముతుంటారు. ఈ నమ్మకాలలో నిజమెంత? ప్రముఖ 'మాస్టర్ ఆఫ్ వైన్' సోనాల్ సి హోలాండ్ ఇటీవల సోషల్ మీడియా ద్వారా మద్యపానానికి సంబంధించి విస్తృతంగా ప్రచారంలో ఉన్న కొన్ని అపోహలను ఖండించారు. ఆ వివరాలేంటో చూద్దాం.


అపోహ 1: వైన్ గుండెకు మేలు చేస్తుంది

రెడ్ వైన్‌లో రెస్వెరాట్రాల్ వంటి యాంటీఆక్సిడెంట్లు ఉంటాయని, అవి మితంగా తీసుకుంటే గుండె ఆరోగ్యానికి కొంత మేలు చేస్తాయని ఒక వాదన ఉంది. అయితే, ఇది పూర్తిగా నిజం కాదని సోనాల్ హోలాండ్ స్పష్టం చేశారు. వైన్‌ను మితంగా తీసుకున్నప్పుడు మాత్రమే ఈ ప్రయోజనం ఉండవచ్చని, అదే పనిగా అతిగా సేవిస్తే అధిక రక్తపోటు, కాలేయ సమస్యలు వంటి తీవ్ర ఆరోగ్య సమస్యలు తలెత్తుతాయని ఆమె హెచ్చరించారు. "మితంగా తీసుకోవడమే కీలకం, అతిగా సేవించడం కాదు" అని ఆమె అన్నారు.

అపోహ 2: టెకీలా తాగితే హ్యాంగోవర్ రాదు

నాణ్యమైన టెకీలా తాగితే హ్యాంగోవర్ రాదనే ప్రచారం కూడా ఉంది. ప్రీమియం టకీలాలో హ్యాంగోవర్‌కు కారణమయ్యే కంజీనర్స్ (రసాయన సమ్మేళనాలు) తక్కువగా ఉండవచ్చని, కానీ ఎంత మంచి టెకీలా అయినా పరిమితికి మించి తాగితే మరుసటి రోజు ఇబ్బంది తప్పదని సోనాల్ హోలాండ్ తెలిపారు. హ్యాంగోవర్ అనేది తాగిన మద్యం రకం కంటే, ఎంత పరిమాణంలో తీసుకున్నారనే దానిపైనే ఎక్కువగా ఆధారపడి ఉంటుందని ఆమె వివరించారు.

అపోహ 3: వోడ్కా ఆరోగ్యకరమైన మద్యం

వోడ్కాలో చక్కెర శాతం తక్కువగా ఉండటం వల్ల దానిని 'క్లీన్' ఆల్కహాల్‌గా, ఆరోగ్యకరమైన ఎంపికగా కొందరు భావిస్తారు. కానీ ఇది కూడా పూర్తిగా వాస్తవం కాదని నిపుణులు చెబుతున్నారు. ఏ రకమైన మద్యం అయినా, పరిమితికి మించి తీసుకుంటే కాలేయంపై తీవ్ర ఒత్తిడి పడుతుందని, దీర్ఘకాలంలో కాలేయానికి నష్టం వాటిల్లుతుందని సోనాల్ హోలాండ్ పేర్కొన్నారు. ఇతర మధ్యాలతో పోలిస్తే వోడ్కా ఆరోగ్యకరమని భావించరాదని, దీనిని కూడా మితంగానే తీసుకోవాలని ఆమె సూచించారు.

మద్యం ఏదైనా సరే, సురక్షితమైనది అంటూ ఏదీ లేదని నిపుణులు స్పష్టం చేస్తున్నారు. కొన్నింటిలో కేలరీలు లేదా చక్కెర తక్కువగా ఉండవచ్చు, కానీ బాధ్యతాయుతంగా తీసుకోకపోతే కాలేయం, గుండె మరియు మొత్తం ఆరోగ్యంపై ప్రతికూల ప్రభావం చూపుతాయి. ఆహారంతో పాటు మద్యం తీసుకోవడం వల్ల అది రక్తంలో నెమ్మదిగా కలిసి, తక్షణ ప్రభావాన్ని తగ్గిస్తుందని, హ్యాంగోవర్ ప్రమాదాన్ని కొంతవరకు తగ్గించవచ్చని సూచిస్తున్నారు. అంతిమంగా, ఏ రకం మద్యం అయినా మితంగా తీసుకోవడమే ఆరోగ్యానికి కీలకమని గుర్తుంచుకోవాలి.