భార్యపై అనుమానం... సుత్తితో తలపగులగొట్టి చంపేశాడు!

నొయిడాలో 55 ఏళ్ల వ్యక్తి తన భార్య వివాహేతర సంబంధం కలిగి ఉందని అనుమానించి ఆమెను దారుణంగా హతమార్చినట్లు అధికారులు శనివారం తెలిపారు. పోలీసుల కథనం ప్రకారం, నిందితుడు నూరుల్లా హైదర్, తన భార్య అస్మా ఖాన్ తలపై సుత్తితో కొట్టడంతో ఆమె అక్కడికక్కడే మరణించింది. ఈ సంఘటన నొయిడాలోని సెక్టార్ 15 ప్రాంతంలో జరిగింది.

42 ఏళ్ల అస్మా ఖాన్ సాఫ్ట్‌వేర్ ఇంజనీర్‌గా సెక్టార్ 62లోని ఒక ప్రైవేట్ కంపెనీలో పనిచేస్తున్నారు. ఆమె ఇంతకుముందు ఢిల్లీలో నివసించేది. జామియా మిలియా ఇస్లామియా నుండి ఇంజనీరింగ్ పట్టా పొందింది. నిందితుడు బీహార్‌కు చెందినవాడు. అతను కూడా ఇంజనీరింగ్ గ్రాడ్యుయేట్. ప్రస్తుతం నిరుద్యోగిగా ఉన్నాడు.

వీరికి 2005లో వివాహం జరిగింది. వారికి ఒక కుమారుడు, ఒక కుమార్తె ఉన్నారు. వారి కుమారుడు ఇంజనీరింగ్ విద్యార్థి కాగా, కుమార్తె 8వ తరగతి చదువుతోంది.

ఈ సంఘటన గురించి మొదట వారి కుమారుడు 112కు ఫోన్ చేసి పోలీసులకు తెలియజేసినట్లు అధికారులు తెలిపారు.

"సమాచారం అందిన వెంటనే, మా బృందం మరియు ఫోరెన్సిక్ నిపుణులు సంఘటన స్థలానికి చేరుకున్నారు. నిందితుడిని అదుపులోకి తీసుకున్నాము. బాధితురాలి మృతదేహాన్ని పోస్ట్మార్టం కోసం పంపాము. మరింత విచారణ జరుగుతోంది" అని డిప్యూటీ కమిషనర్ ఆఫ్ పోలీస్ రాంబాదన్ సింగ్ తెలిపారు.

హైదర్ తన భార్య వివాహేతర సంబంధాలు కలిగి ఉందని అనుమానించాడని ప్రాథమిక విచారణలో తేలింది. "ఈ ఉదయం వారి కుమార్తె నాకు ఈ విషయం చెప్పింది. వారు చాలా రోజులుగా గొడవ పడుతున్నారు. అతను ఇంత దారుణమైన చర్యకు పాల్పడతాడని మేము ఊహించలేదు" అని బాధితురాలి బావ తెలిపారు.