శుభ్ మాన్ గిల్ సెంచరీపై సచిన్ స్పందన

ఇటీవల కాలంలో ఫామ్ కోల్పోయి తీవ్రంగా ఇబ్బందులు ఎదుర్కొంటున్న యువ బ్యాట్స్ మన్ శుభ్ మాన్ గిల్ ఇంగ్లండ్ తో రెండో టెస్టులో సెంచరీ ద్వారా మళ్లీ టచ్ లోకి వచ్చాడు. సెకండ్ ఇన్నింగ్స్ లో గిల్ 147 బంతుల్లో 11 ఫోర్లు, 2 సిక్సులతో 104 పరుగులు చేశాడు. 

ఈ నేపథ్యంలో, గిల్ సెంచరీపై భారత బ్యాటింగ్ దిగ్గజం సచిన్ టెండూల్కర్ స్పందించాడు. "సరైన సమయంలో సెంచరీ కొట్టినందుకు శుభాభినందనలు. ఈ ఇన్నింగ్స్ లో శుభ్ మాన్ గిల్ బ్యాటింగ్ పూర్తి నైపుణ్యంతో కొనసాగింది" అంటూ కొనియాడాడు. 

కాగా, శుభ్ మాన్ గిల్... సచిన్ కుమార్తె సారా టెండూల్కర్ తో డేటింగ్ లో ఉన్నాడని కొన్నాళ్లుగా ప్రచారం జరుగుతోంది.  ఇటీవల సారా, గిల్ సోదరి ఒకే కారులో కనిపించడం ఊహాగానాలకు బలం చేకూర్చింది.