భారత చిత్ర పరిశ్రమలో తొలిసారి.. అల్లు అర్జున్ కోసం హైదరాబాద్ వచ్చిన ఇన్‌స్టాగ్రామ్ .. ఓ రోజంతా బన్నీతో!

పుష్ప సినిమాతో ప్రపంచ వ్యాప్తంగా గుర్తింపు దక్కించుకున్నాడు ఐకాన్ స్టార్ అల్లు అర్జున్. ఆ సినిమాలో నటనకు గాను జాతీయ ఉత్తమ నటుడు అవార్డు కూడా కైవసం చేసుకున్నాడు. ఈ ఘనత సాధించిన తొలి తెలుగు నటుడిగా నిలిచాడు. దాంతో, బన్నీపై ప్రశంసల వర్షం కురుస్తోంది. ఈ క్రమంలో అల్లు అర్జున్ ఇన్ స్టాగ్రామ్ లో అభిమానులకు సర్ ప్రైజ్ ఇచ్చాడు. ఒక రోజులో తన దిన చర్య ఎలా ఉంటుంది? షూటింగ్ ముందు ఏం చేస్తాడు? షాట్ కు ఎలా ప్రిపేర్ అవుతాడు? అనే విషయాల సమాహారంతో ఇన్‌స్టాగ్రామ్ కోసం ప్రత్యేకంగా రూపొందించిన వీడియోను ఈ రోజు షేర్ చేశాడు. ఇలా ఇన్‌స్టాగ్రామ్ ఒక భారతీయ నటుడి వద్దకు ఒక రోజులో తను ఏం చేస్తాడనే విషయాలను వీడియో రూపంలో చూపించటం ఇదే మొదటిసారి.

ప్రపంచ వ్యాప్తంగా అల్లు అర్జున్ అభిమానులకోసం ఇన్ స్టాగ్రామ్ మొదటిసారిగా, భారత్,  హైదరాబాద్ వచ్చి, అల్లు అర్జున్ తో కలిసి వీడియో చేసింది. ఈ వీడియోలో బన్నీ నివాసం, రామోజీ ఫిల్మ్ సిటీలో 'పుష్ప 2' షూటింగ్ స్పాట్, తన అభిమానులతో బన్నీ ఎలా ఉంటాడనే విషయాలను చూపించింది. ప్రతి రోజు లేవగానే గార్డెన్ లోకి వచ్చి వాతావరణాన్ని ఆస్వాదిస్తూ బ్లాక్ కాఫీ తాగడం, మధ్యాహ్నం ఒంటి గంట అవగానే తన పిల్లలతో వీడియో కాల్ చేసి మాట్లాడే విషయాలను చూపెట్టింది. ఇక సెట్స్‌ లో దర్శకుడు సుకుమార్ తో సినిమా గురించి చర్చించి, సెట్స్‌లో ఓ షాట్ ను చిత్రీకరించే విషయాన్ని కూడా వీడియోలో చూపించారు.