వాల్తేరు వీరయ్య నుంచి 'పూనకాలు లోడింగ్' సాంగ్ విడుదల

మెగాస్టార్ చిరంజీవి హీరోగా బాబీ దర్శకత్వంలో రూపుదిద్దుకున్న 'వాల్తేరు వీరయ్య' చిత్రం నుంచి పక్కా మాస్ బీట్ తో కూడిన 'పూనకాలు లోడింగ్' పాట లిరికల్ వీడియో వచ్చేసింది. ఈ లిరికల్ వీడియోను చిత్రబృందం యూట్యూబ్ లో విడుదల చేసింది. ఈ పాటలో వందల సంఖ్యలో డ్యాన్సర్లతో చిరంజీవి, రవితేజ హుషారుగా డ్యాన్స్ చేయడం ఫ్యాన్స్ కు కనువిందు చేస్తుంది. 

దేవిశ్రీప్రసాద్ చీర్ హార్న్ ఇన్ స్ట్రుమెంట్ తో ఈ పాటలో తనదైన శైలిలో చమక్కు చేశారు. "డోంట్ స్టాప్ డ్యాన్సింగ్... పూనకాలు లోడింగ్" అంటూ ఈ పాటకు చిరంజీవి, రవితేజ కూడా గొంతు కలిపారు. ర్యాప్ సింగర్ రోల్ రైడా కాన్సెప్ట్ ఆధారంగా ఈ పాటకు లిరిక్స్ సమకూర్చారు. ఈ పాటను రామ్ మిరియాల, రోల్ రైడా ఆలపించారు. 

ఈ భారీ యాక్షన్ ఎంటర్టయినర్ చిత్రంలో చిరంజీవి సరసన శ్రుతిహాసన్ నటించింది. ఈ చిత్రంలో రవితేజ, కేథరిన్ ట్రెసా కీలకపాత్రల్లో కనిపించనున్నారు. వాల్తేరు వీరయ్య చిత్రాన్ని మైత్రీ మూవీ మేకర్స్ బ్యానర్ పై నవీన్ యెర్నేని, వై రవిశంకర్ నిర్మించారు. ఈ చిత్రం సంక్రాంతి కానుకగా జనవరి 13న ప్రేక్షకుల ముందుకు రానుంది.