బురద నిండిన గుంతల రోడ్డుపై పెళ్లి కూతురు.. వైరల్​ వీడియో ఇదిగో

ఇటీవలి కాలంలో పెళ్లి ఫొటోలు, వీడియోలు కొత్త పుంతలు తొక్కుతున్నాయి. ప్రీ వెడ్డింగ్ ఫొటో షూట్లు అయితే ఒక్కోసారి తీవ్రంగా కలకలం రేపుతున్నాయి. ఎక్కడెక్కడికో వెళుతూ.. చిత్రమైన పద్ధతుల్లో షూటింగ్ లు చేస్తూండటం ఆకట్టుకుంటోంది. అయితే కేరళకు చెందిన ఓ యువతి, ఆమె పెళ్లికి ఫొటోలు, వీడియోల కాంట్రాక్టు తీసుకున్న యారో వెడ్డింగ్ కంపెనీ వాళ్లు కలిసి చిత్రమైన ఆలోచన చేశారు. వెడ్డింగ్ ఫొటో షూట్ కార్యక్రమాన్ని సామాజిక సమస్య అంశానికి జత చేశారు.

గుంతల సమస్యను చెప్పుకోవడానికి..

• కేరళలో నిండా గుంతలు, బురదతో నిండిన ఓ రోడ్డులో పెళ్లి కూతురుతో ఫొటో షూట్ చేశారు. ఎరుపు రంగు చీర కట్టుకుని, ఒంటి నిండా నగలు వేసుకుని.. అందంగా తయారైన పెళ్లి కూతురు ఆ బురద, గుంతల మధ్య నుంచి నడుచుకుంటూ వస్తుండగా ఫొటోలు, వీడియోలు తీశారు. 
• ఆ సమయంలో పలు వాహనాలు కూడా ఆ దారిలో ప్రయాణిస్తున్నాయి. గుంతల నుంచి తప్పించుకుంటూ, పడిపోకుండా ఉండేలా మెల్లగా వాహనాలు నడుపుకొంటూ వెళ్లడం కనిపిస్తోంది.
• తమ ప్రాంతంలో రోడ్లు సరిగా లేని పరిస్థితి, చిన్న వర్షానికే అంతా బురదగా మారుతున్న దుస్థితిని చూపించడం కోసం తాము ఈ పనిచేసినట్టు పెళ్లి కూతురు, వెడ్డింగ్ ఫొటోగ్రాఫర్లు చెబుతున్నారు.
• ఇన్ స్టాగ్రామ్ లో, యూట్యూబ్ లో దీనికి సంబంధించిన వీడియో వైరల్ గా మారింది. ఇన్ స్టా గ్రామ్ లో ఏకంగా 43 లక్షల వ్యూస్ రాగా.. మూడు లక్షలకు పైగా లైకులు వచ్చాయి.
• ‘అది రోడ్డులా లేదు.. స్విమ్మింగ్ పూల్స్ తో కూడిన ఏరియాలా ఉంది..’ అని కొందరు కామెంట్ చేస్తుంటే.. ‘నీటి గుంతలు బాగున్నాయి. హాయిగా కొన్ని చేపలు తెచ్చి పెంచుకోవచ్చు..’ అంటున్నారు.