రజనీకాంత్ ఆరోగ్యంపై తాజా బులెటిన్ విడుదల చేసిన కావేరీ ఆసుపత్రి

దక్షిణాది సూపర్ స్టార్ రజనీకాంత్ నిన్న సాయంత్రం చెన్నైలోని కావేరీ ఆసుపత్రిలో చేరడం తెలిసిందే. రజనీకాంత్ ఆరోగ్యంపై కావేరీ ఆసుపత్రి ఈ మధ్యాహ్నం తాజా బులెటిన్ విడుదల చేసింది. చెన్నై ఆళ్వారుపేటలోని కావేరీ ఆసుపత్రిలో నిన్న చేరారని, తల తిరుగుతుండడంతో ఆయన అసౌకర్యానికి గురయ్యారని ఆ బులెటిన్ లో వివరించారు.

రజనీకాంత్ ను నిపుణులైన వైద్య బృందం నిశితంగా పరిశీలించిందని, ఆయనకు కరోటిడ్ ఆర్టెరీ రీవాస్కులరైజేషన్ ప్రక్రియ నిర్వహించాలని నిర్ణయించిందని తెలిపారు. ఈ క్రమంలో నేటి ఉదయం ఆయనకు రీవాస్కులరైజేషన్ ప్రక్రియ విజయవంతంగా నిర్వహించడం జరిగిందని, ఆయన కోలుకుంటున్నారని పేర్కొన్నారు. మరికొన్నిరోజుల్లో రజనీకాంత్ ఆసుపత్రి నుంచి డిశ్చార్జ్ అవుతారని ఆ బులెటిన్ లో వెల్లడించారు.