విజయనగరం రోడ్డు ప్రమాదంపై దిగ్భ్రాంతిని వ్యక్తం చేసిన జగన్

విజయనగరం జిల్లాలో ఘోర రోడ్డు ప్రమాదం సంభవించిన సంగతి తెలిసిందే. ఆర్టీసీ బస్సులు, లారీ ఢీకొన్న ఘటనలో నలుగురు దుర్మరణం పాలయ్యారు. విజయనగరం రూరల్ సుంకరిపేట వద్ద విశాఖ-విజయనగరం హైవేపై ఈ ప్రమాదం జరిగింది. ఎదురెదురుగా వస్తున్న రెండు ఆర్టీసీ బస్సులు ఒకదాన్ని మరొకటి ఢీకొన్నాయి. ఈ క్రమంలో అటుగా వస్తున్న ఒక లారీ ప్రమాదానికి గురైన ఓ ఆర్టీసీ బస్సును వెనుక నుంచి ఢీకొంది. ఈ ప్రమాదంలో నలుగురు మృతి చెందగా... పలువురు తీవ్రంగా గాయపడ్డారు. వీరిలో ఐదుగురి పరిస్థితి విషమంగా ఉన్నట్టు తెలుస్తోంది.

మరోవైపు ఈ ప్రమాదంపై ముఖ్యమంత్రి జగన్ దిగ్భ్రాంతిని వ్యక్తం చేశారు. అధికారులతో ప్రమాదంపై ఆయన ఆరా తీశారు. లారీ ఢీకొనడంతోనే ఈ ప్రమాదం జరిగినట్టు అధికారులు ఆయనకు చెప్పారు. ప్రమాదంలో చనిపోయిన వారి కుటుంబాలకు జగన్ సంతాపాన్ని తెలియజేశారు. గాయపడిన వారికి మెరుగైన వైద్య చికిత్స అందించాలని ఆదేశించారు.