అసెంబ్లీ లాబీల్లో ఈరోజు మాజీ మంత్రి, టీడీపీ అధినేత చంద్రబాబు తనయుడు నారా లోకేశ్ స్పెషల్‌ అట్రాక్షన్‌ అయ్యారు. సార్వత్రిక ఎన్నికల ఫలితాల తర్వాత తొలిసారి ఆయన అసెంబ్లీ ప్రాంగణంలో కనిపించారు. ఎమ్మెల్సీ అయిన లోకేశ్ మంగళగిరి నుంచి  ఈ ఎన్నికల్లో పోటీచేసి ఓటమి చెందిన విషయం తెలిసిందే. ఈరోజు ఉమ్మడి సభల నుద్దేశించి గవర్నర్‌ ప్రసంగిస్తుండడంతో ఆయన హాజరయ్యారు.

ఈ సందర్భంగా పలువురు స్వపార్టీ నేతలు, అధికార పక్ష నేతలతో కరచాలనం చేశారు. మంత్రులు అంజద్‌బాషా, ఆదిమూలపు సురేష్‌, ఎమ్మెల్యే ఆనం రాంనారాయణరెడ్డిలను అభినందించారు. బీజేపీ ఎమ్మెల్సీ సోము వీర్రాజును పలకరించారు. ఇంకా పలువురు ఎమ్మెల్యేలు, మంత్రులతో కరచాలనం చేస్తూ ఉత్సాహంగా కనిపించారు.