ట్రంప్ కోసం పనిచేస్తున్నావని ఆరోపిస్తూ సారా సాండర్స్ ను గెంటేసిన రెస్టారెంట్!

వైట్ హౌస్ మీడియా కార్యదర్శి సారా హకాబీ సాండర్స్ కు ఓ రెస్టారెంట్ చేదు అనుభవాన్ని మిగిల్చింది. డొనాల్డ్ ట్రంప్ కోసం ఆమె పని చేస్తున్నదని ఆరోపిస్తూ, రెస్టారెంట్ యజమాని, ఆమెపై దురుసుగా ప్రవర్తించాడు. ఆమెను రెస్టారెంట్ నుంచి వెళ్లిపొమ్మని గద్దించాడు.

తన ట్విట్టర్ ఖాతాలో ఈ విషయాన్ని వెల్లడించిన సారా, వర్జీనియాలోని లెక్సింగ్టన్ లో ఉన్న 'ద రెడ్ హెన్' రెస్టారెంట్ లో ఈ ఘటన జరిగిందని, యజమానే స్వయంగా వెళ్లిపోవాలని చెప్పడంతో, తాను మౌనంగానే అక్కడి నుంచి వచ్చేశానని అన్నారు. ఈ ఘటనతో తానేమీ పెద్దగా బాధపడలేదని, రెస్టారెంట్ యజమానే తన స్వభావాన్ని బయట పెట్టుకున్నాడని అన్నారు. ఇక ఈ ట్వీట్ కు 22 వేలకు పైగా స్పందనలు రావడం గమనార్హం. వీటిల్లో ఆమెకు అనుకూలమైనవి, వ్యతిరేకమైనవి కూడా ఉన్నాయి.