రాయల్ ఛాలెంజర్స్ బెంగళూరు జట్టులో మార్పు

రాయల్ ఛాలెంజర్స్ బెంగళూరు (ఆర్సీబీ) జట్టులో ఆస్ట్రేలియా ఆటగాడు నాథన్ కౌల్టర్ నైల్ స్థానంలో కివీస్ ప్లేయర్ కోరె అండర్సన్‌ను తీసుకున్నట్లు ఐపీఎల్ టెక్నికల్ కమిటీ తెలిపింది. ఫలితంగా కౌల్టర్ నైల్ ఈ ఏడాది ఐపీఎల్ సీజన్‌కు దూరమయ్యాడు. నైల్ గాయంతో బాధపడుతున్నందు వల్ల ఈ నిర్ణయం తీసుకున్నామని ఆర్సీబీ ఫ్రాంచైజీ యాజమాన్యం తెలిపింది.

ఐపీఎల్ నిబంధనల ప్రకారం, వేలం కోసం పేర్లు నమోదు చేసుకున్న ప్లేయర్లలో ఎవరినైనా అవసరమైనప్పుడు ఎంపిక చేసుకోవచ్చు. ఈ నేపథ్యంలో రూ.2 కోట్ల కనీస ధరకే అండర్సన్‌ను ఆర్సీబీ దక్కించుకుంది. కాగా, ఐపీఎల్ మ్యాచ్‌లు వచ్చే నెల 7న మొదలవుతున్న సంగతి విదితమే. ఈ మెగా టోర్నీలో భాగంగా ఏప్రిల్ 8న ఆర్సీబీ తన తొలి మ్యాచ్‌లో కోల్‌కతా నైట్ రైడర్స్‌తో తలపడుతుంది. కోల్‌కతాలోని ఈడెన్ గార్డెన్స్‌ వేదికగా ఈ మ్యాచ్ జరగనుంది.