పుణ్యానికి పోయిన టెక్కీని తరుముకొచ్చిన మృత్యువు

వాహనాలపై కొండ చరియలు విరిగిపడగా గాయాలతో ఉన్నవారిని కాపాడేందుకు వెళ్లిన ఓ యువకుడిని గుర్తు తెలియని వాహనం ఢీకొట్టింది. ఈ ఘటనలో ముంబై - పుణె హైవేపై ఖోపోలీ ప్రాంత సాఫ్ట్ వేర్ ఉద్యోగి గణపత్ పాండురంగ్ కుద్పాన్ అక్కడికక్కడే మరణించాడు. ఈ హైవేపై అదోషీ టన్నెల్ ప్రాంతంలో కొండచరియలు విరిగిపడ్డాయి. పైనుంచి రాళ్లు పడి బైకుపై వెళుతున్న ఇద్దరు యువకులు, ఓ కారులోని వారికి తీవ్రగాయాలయ్యాయి. ఆ ప్రాంతంలోనే ఉన్న గణపత్ విషయాన్ని పోలీసులకు చెప్పి గాయపడిన వారికి సాయపడేందుకు వెళ్లాడు. ఆ సమయంలోనే వేగంగా వస్తున్న ఓ వాహనం గణపత్ ను ఢీ కొట్టింది. ఆపై ఆగకుండా వెళ్లిపోయింది. స్థానికులు విషయాన్ని గమనించి గణపత్ ను హుటాహుటిన ఆసుపత్రికి తీసుకెళ్లగా, అప్పటికే ఆయన మరణించినట్టు వైద్యులు తెలిపారు. పోలీసులు కేసు నమోదు చేసుకుని దర్యాప్తు చేస్తున్నట్టు తెలిపారు.