విమానం కూలిన సమయంలో కాక్ పిట్ లో లేని పైలట్... వాయిస్ రికార్డర్ సమాచారం

రెండు రోజుల క్రితం ఫ్రాన్స్ లోని పర్వతాలలో కూలిపోయిన జర్మన్ వింగ్స్ విమాన ప్రమాదానికి సంబంధించిన కారణాలు ఒక్కొక్కటిగా బయటకు వస్తున్నాయి. ప్రమాదం జరిగిన సమయంలో కాక్ పిట్ లో ఉండాల్సిన ఒక పైలట్ క్యాబిన్ లో చిక్కుకుపోయాడట. ఈ విషయం కాక్ పిట్ వాయిస్ రికార్డర్ లో రికార్డయిందని విచారణ అధికారి ఒకరు తెలిపారు. విమానం వేగంగా కిందకు పడిపోతుండటంతో ఆ పైలెట్ కాక్ పిట్ లోకి తిరిగి వెళ్ళలేకపోయాడని వివరించారు. బార్సిలోనా నుంచి బయలుదేరిన తరువాత ఇద్దరు పైలట్ల మధ్య ఆహ్లాదకర సంభాషణ సాగిందని, ఆపై ఒక పైలట్ బయటకు వెళ్ళాడని, ఆ తర్వాత తిరిగి వచ్చినట్టు రికార్డ్ కాలేదని పేర్కొన్నారు. బయట ఉన్న పైలట్ కాక్ పిట్ తలుపును తొలుత నెమ్మదిగా, ఆపై గట్టిగా కొడుతున్న శబ్దాలు వినిపించాయని తెలిపారు. రెండో పైలట్ కు తలుపు తీసే సమయం కూడా లేకపోయిందని ఆయన అన్నారు. ఈ ఘటన విమానం కూలిపోయేందుకు క్షణాల ముందు జరిగిందని తెలిపారు.