అంతరిక్ష రంగంలో భారత్ జైత్రయాత్ర కొనసాగుతోంది. వరుస విజయాలతో రికార్డులు సృష్టిస్తూ దూసుకెళుతున్న భారత అంతరిక్ష పరిశోధన సంస్థ ఇస్రో చరిత్రలో మరో విజయం చేరింది. శనివారం అర్ధరాత్రి దాటిన తర్వాత ఆదివారం తెల్లవారుజామున 2.10 గంటలకు ప్రయోగించిన జీశాట్-16 ప్రయోగం విజయవంతమైంది. ప్రతికూల వాతావరణ పరిస్థితుల నేపథ్యంలో రెండు రోజులుగా వాయిదా పడుతూ వస్తున్న ఈ ప్రయోగాన్ని ఇస్రో శనివారం రాత్రి ఫ్రెంచ్ గయానాలోని కౌరు అంతరిక్ష కేంద్రం నుంచి దిగ్విజయంగా ప్రయోగించింది. భారత కమ్యూనికేషన్స్ రంగానికి మరింత ఊతమివ్వనున్న జీశాట్-16, అమెరికాలో డైరెక్ట్ టు హోం టెలివిజన్ ప్రసారాలను మెరుగుపరచనున్న డైరెక్ట్ టీవీ-14 ఉపగ్రహాన్ని తనవెంట తీసుకెళ్లింది. జీశాట్-16 కారణంగా భారత్ లో టీవీ, రేడియో ప్రసారాలు మరింత మెరుగు కావడమే కాక టెలిఫోన్ సేవలు కూడా విస్తృతం కానున్నాయి. 12 ఏళ్ల పాటు అంతరిక్షంలో ఉండే జీశాట్-16, ఏప్రిల్ లో అర్ధాంతరంగా నిలిచిపోయిన ఇన్ శాట్-3ఈ స్థానాన్ని భర్తీ చేయనుంది.