కోలీవుడ్ నుంచి వచ్చే లవ్ స్టోరీస్ లో మంచి ఫీల్ ఉంటుంది. అందువలన ప్రేమకథాంశంతో కూడిన  తమిళ సినిమాలకు ఓటీటీలో మంచి ఆదరణ లభిస్తూ ఉంటుంది. అలా ఈ మధ్య కాలంలో తమిళంలో రూపొందిన లవ్ స్టోరీనే '29'. రత్నకుమార్ వినిపించిన ఈ కథ వినగానే, దర్శకుడు లోకేశ్ కనగరాజ్ .. కార్తీక్ సుబ్బరాజు నిర్మాతలుగా ముందుకు రావడం విశేషం. మే 8వ తేదీన థియేటర్లకు వచ్చిన ఈ సినిమా, ఈ రోజు (జూన్ 5వ తేదీ) నుంచి 'నెట్ ఫ్లిక్స్'లో ఐదు భాషల్లో అందుబాటులోకి వచ్చింది.
 
సత్య (విధు) తన తల్లిదండ్రులతో కలిసి 'సేలమ్'లో నివసిస్తూ ఉంటాడు. సత్య మొదటి నుంచి ముక్కుసూటి మనిషి. లోపల ఒకలా .. బయటికి ఒకలా ఉండటం అతనికి ఎంతమాత్రం ఇష్టం ఉండదు. తనకి నచ్చినట్టుగా బ్రతకడమే తనకి ఇష్టం. అందుకోసమే అతను 'సేలం' నుంచి చెన్నైకి వెళతాడు. అక్కడే అతను మణి .. వసంత్ అనే స్నేహితులతో కలిసి ఒక రూమ్ లో ఉంటూ ఉంటాడు. జాబ్ విషయంలో అంతగా సంతృప్తి లేకపోయినా, ఖర్చుల కోసం నెట్టుకొస్తుంటాడు.

29 ఏళ్లు వచ్చినా తనని ఎవరూ ప్రేమించకపోవడం .. తనకంటూ ఒక లవర్ లేకపోవడం సత్యకు నిరాశను కలిగిస్తూ ఉంటుంది. అలాంటి పరిస్థితులలోనే అతనికి విజయలక్ష్మి (ప్రీతి అస్రాని) పరిచయమవుతుంది. ఆమెతో పరిచయం ప్రేమగా మారుతుంది. ఐఏఎస్ కావాలనేది విజయలక్ష్మి ఆశయం. అందుకోసం ఆమె కష్టపడి చదువుతూ ఉంటుంది. ఒక లక్ష్యం .. గమ్యం అనే ఆలోచన లేకుండా సత్య ఉండటం ఆమెకి అసంతృప్తిని కలిగిస్తూ ఉంటుంది. 

విజయలక్ష్మికి తన తండ్రి ఎలా ఉంటాడనేది తెలియదు. తన చిన్నతనంలోనే వెళ్లిపోయిన తండ్రిని ఒకసారి చూడాలనే కోరిక ఆమెలో బలంగా ఉంటుంది. తల్లి కోరిక మేరకు తాను బాగా చదువుకుని ప్రభుత్వ ఉద్యోగాన్ని చేయాలనే పట్టుదలతో ఉంటుంది. ఒక వైపున ప్రేమ అంటూ వెంటపడే సత్య. మరొక వైపున చదువు పూర్తి చేయమనే తల్లి. అలాంటి పరిస్థితులలో ఆమె ఏం చేస్తుంది? ఆమె తీసుకునే నిర్ణయం వాళ్ల జీవితాలను ఎలా ప్రభావితం చేస్తుంది? అనేది కథ.

కాలేజ్ చదువైపోయిన తరువాత ఒక్కో ఏడాది గడిచిపోతుంటే, ఇక జాబ్ రాదేమోననే టెన్షన్ సహజంగానే ఉంటుంది. అవకాశాలు వెదుక్కుంటూ వెళ్లకపోతే వెనకబడిపోతున్నామనే భయం మొదలవుతుంది. ఉన్న ఊళ్లోనే గొడవలు పడుతూ అవమానాలు పొందడం అలవాటైపోతుంది.  అయితే '29' ఏళ్లు వచ్చినా ప్రేమలో పడకపోతే .. పెళ్లి ఆశలు కనిపించకపోతే అదే అసలైన టెన్షన్ అంటూ దర్శకుడు తయారు చేసుకున్న కథనే '29'. ఇది ఈ కథలో హీరోగారి ఏజ్.

 ప్రేమించుకోవడానికి కులమతాలతో సంబంధం లేదు. నిజమైన ప్రేమికులు ఆర్ధికపరమై తారతమ్యాలు పట్టించుకోరు. అయితే ప్రేమికులు పుట్టి పెరిగిన వాతావరణం .. వాళ్ల కుటుంబ నేపథ్యాలు .. వాళ్ల ఆలోచనలను ప్రభావితం చేస్తాయనే అంశాన్ని దర్శకుడు టచ్ చేస్తూ వెళ్లాడు. తన ప్రేయసి తన కళ్లముందుంటే చాలని హీరో అనుకుంటాడు. తనకి మాదిరిగానే అతనికి కూడా ఒక లక్ష్యం .. గమ్యం ఉంటే బాగుంటుందని ఆమె భావించడం దగ్గరే ఈ కథ మలుపు తిరుగుతుంది. 

ఈ కథ చాలా సింపుల్ గా ముందుకు వెళుతూ ఉంటుంది. సున్నితమైన భావోద్వేగాలను కలిగిస్తూ సాగుతూ ఉంటుంది. రొటీన్ గా కనిపించే సన్నివేశాలే అయినా, దర్శకుడు ఫీల్ మిస్సవ్వకుండా చూసుకున్నాడు. తన తల్లి ఆశయాన్ని నెరవేర్చడం కోసం హీరోను హీరోయిన్ దూరం పెడుతుంది. తన నుంచి విజయలక్ష్మీ ఏం ఆశిస్తుందనేది అర్థమైన తరువాత, అతను ఒక ఆశయాన్ని ఏర్పరచుకుంటాడు. 

సత్య తన తల్లి ఆశయాన్ని నెరవేర్చడం కోసం రంగంలోకి దిగుతాడు. ఆ క్రమంలో డబ్బు - అధికారం ఉన్న వ్యక్తిని ఢీ కొనడం.. జైలు పాలు కావడం .. అయితే తన లక్ష్యాన్ని మార్చుకోకపోవడం ఈ కథను మరింత బలంగా మారుస్తూ ముందుకు తీసుకుని వెళుతుంది. ఒక లక్ష్యం పెట్టుకుని దానిని సాధించడంలోని ఆనందం ఎలా ఉంటుందనేది అప్పుడు అర్థం చేసుకుంటాడు.

కథలో భారీతనం .. కథనంలో ట్విస్టులు లేకపోయినా, సహజమైన సన్నివేశాలతో .. మనసుకు హత్తుకునే దృశ్యాలతో ఈ కథ ముందుకు వెళుతుంది. యూత్ లో ప్రతి ఒక్కరికీ ఇది తమ కథ అనిపిస్తుంది .. ఆకట్టుకుంటుంది. కథలోని ఈ ఫీల్ కారణంగానే లోకేశ్ కనగరాజ్ - కార్తీక్ సుబ్బరాజ్ నిర్మాతలుగా ముందుకు వచ్చారేమో అనిపిస్తుంది. 

అక్కడక్కడా కాస్త సాగదీసినట్టుగా అనిపించినప్పటికీ, ఫీల్ తో మేనేజ్ చేస్తూ వెళుతుంది. విధు నటన ఆకట్టుకుంటుంది. అసలు అతను కెమెరా ముందు ఉన్న విషయాన్ని మరిచిపోయాడు. ప్రీతీ అస్రాని ప్రత్యేక ఆకర్షణ అనే చెప్పాలి. కడిగిన ముత్యంలా కనిపిస్తూ, తన నటనతోను యూత్ మనసులు దోచేస్తుంది. మాదేశ్ ఫొటోగ్రఫీ .. సీన్ రోల్డన్  సంగీతం .. సతీశ్ కుమార్ ఎడిటింగ్ ఫరవాలేదు.       

ప్రేమ అనేది ఎంతో గొప్పది .. దానికి మించిన ప్రపంచం మరొకటి లేదు అని భావించే అబ్బాయికీ, ప్రేమ అనేది ఒక ఫాంటసీనే. జీవితమనే ప్రయాణం వాస్తవంలో చేయవలసి ఉంటుందని నమ్మిన అమ్మాయికి మధ్య జరిగే ఈ కథ యూత్ ను తప్పకుండా ఆలోచింపజేస్తుంది. ప్రేమ కొత్త ఆశలు చిగురింపజేస్తుంది. అయితే ఆశ కంటే ఆశయం గొప్పదని నిరూపించే సందేశం మనకి ఈ కథలో కనిపిస్తుంది.