హైదరాబాదీ ఖగోళవేత్త రోహన్ నాయుడు అరుదైన ఆవిష్కరణ.. వెలుగులోకి 'బ్లాక్ హోల్ స్టార్'!

ఖగోళ శాస్త్రంలో ఓ అద్భుతం ఆవిష్కృతమైంది. హైదరాబాద్‌కు చెందిన యువ శాస్త్రవేత్త రోహన్ నాయుడు నేతృత్వంలోని పరిశోధన బృందం, ఇప్పటివరకు సైన్స్ ప్రపంచానికి తెలియని సరికొత్త ఖగోళ వస్తువును కనుగొంది. దీనికి 'బ్లాక్ హోల్ స్టార్' (కృష్ణబిల నక్షత్రం) అని పేరు పెట్టారు. నాసా ప్రయోగించిన శక్తిమంతమైన జేమ్స్ వెబ్ స్పేస్ టెలిస్కోప్ అందించిన సమాచారాన్ని విశ్లేషించడం ద్వారా ఈ బృందం ఈ చారిత్రక ఆవిష్కరణ చేసింది. ఈ కీలక పరిశోధన వివరాలతో కూడిన కథనం ప్రఖ్యాత 'నేచర్' సైన్స్ జర్నల్‌లో ప్రచురితమైంది.

ఏమిటీ బ్లాక్ హోల్ స్టార్?
శాస్త్రవేత్తలు గుర్తించిన ఈ వింత వస్తువుకు 'MoM-BH*-1' అని పేరు పెట్టారు. ఇది సెటస్ నక్షత్రరాశిలో ఉంది. మహావిస్ఫోటనం (బిగ్ బ్యాంగ్) జరిగిన సుమారు 66 కోట్ల సంవత్సరాల తర్వాత ఇది ఏర్పడిందని అంచనా వేస్తున్నారు. జేమ్స్ వెబ్ తీసిన చిత్రాలలో ఇది అత్యంత ఎర్రగా, ఒక చిన్న చుక్కలా కనిపిస్తోంది. దీని నిర్మాణం చాలా విలక్షణంగా ఉంది. దీని కేంద్రంలో సూర్యుడి ద్రవ్యరాశితో పోలిస్తే ఏకంగా 1,00,000 రెట్లు పెద్దదైన ఒక కృష్ణబిలం ఉంది. ఈ కృష్ణబిలం చుట్టూ మన సౌర వ్యవస్థ పరిమాణంలో దట్టమైన వాయువుల పొర ఆవరించి ఉంది.

సాధారణంగా నక్షత్రాలు కేంద్రక సంలీన చర్య ద్వారా శక్తిని, కాంతిని విడుదల చేస్తాయి. కానీ ఈ 'బ్లాక్ హోల్ స్టార్' కేంద్రంలోని కృష్ణబిలం శక్తితోనే ప్రకాశిస్తోంది. దీని కాంతి సాధారణ నక్షత్రం కంటే 100 బిలియన్ రెట్లు అధికంగా ఉన్నట్లు శాస్త్రవేత్తలు అంచనా వేశారు. బయటకు కనిపించే దట్టమైన వాయువుల పొర కారణంగా ఇది అచ్చం నక్షత్రంలా కనిపిస్తున్నప్పటికీ, దీనిని నడిపించేది మాత్రం కేంద్రంలోని కృష్ణబిలమే.

పరిశోధన ప్రాముఖ్యత
విశ్వం తొలిదశకు సంబంధించిన చిత్రాలను జేమ్స్ వెబ్ టెలిస్కోప్ పంపినప్పుడు, అందులో 'లిటిల్ రెడ్ డాట్స్' (చిన్న ఎర్ర చుక్కలు)గా పిలిచే అనేక వస్తువులు కనిపించాయి. ఇవి ఆ కాలంలో సర్వసాధారణంగా ఉన్నప్పటికీ, ప్రస్తుత విశ్వంలో దాదాపు కనిపించవు. ఈ ఎర్ర చుక్కల రహస్యం ఏంటనేది శాస్త్రవేత్తలకు అంతుచిక్కలేదు. రోహన్ నాయుడు బృందం ఇప్పుడు కనుగొన్న 'బ్లాక్ హోల్ స్టార్స్' బహుశా ఆనాటి 'లిటిల్ రెడ్ డాట్స్' అయ్యుండొచ్చని భావిస్తున్నారు. గెలాక్సీల కేంద్రంలో ఉండే మహాకాయ కృష్ణబిలాలు (Supermassive Black Holes) ఎలా ఏర్పడ్డాయో, ఎలా పెరిగాయో వివరించే క్రమంలో ఇది ఒక కీలక దశ కావొచ్చని అభిప్రాయ‌ప‌డుతున్నారు.

హైదరాబాద్ నుంచి హార్వర్డ్ వరకు రోహన్ ప్రస్థానం
ఈ చారిత్రక ఆవిష్కరణకు నేతృత్వం వహించిన రోహన్ నాయుడు హైదరాబాద్‌లో జన్మించారు. 18 ఏళ్ల వయసులో భారతదేశంలో ఇంజనీరింగ్ చదువును మధ్యలోనే ఆపేసి, సింగపూర్‌లోని యేల్-ఎన్‌యూఎస్ కాలేజీలో చేరారు. ఆ తర్వాత యేల్, హార్వర్డ్ విశ్వవిద్యాలయాల్లో ఉన్నత విద్యను అభ్యసించి పీహెచ్‌డీ పట్టా పొందారు. నాసా హబుల్ ఫెలో, ఎంఐటీలో పప్పలార్డో ఫెలోగా పనిచేసిన ఆయన, ప్రస్తుతం హవాయి విశ్వవిద్యాలయంలోని ఇన్‌స్టిట్యూట్ ఫర్ ఆస్ట్రానమీలో బాధ్యతలు నిర్వర్తిస్తున్నారు. ఈ సిద్ధాంతాన్ని పూర్తిగా నిర్ధారించడానికి, ఇలాంటి వస్తువుల గురించి మరింత లోతుగా అర్థం చేసుకోవడానికి మరిన్ని పరిశీలనలు అవసరమని రోహన్ నాయుడు బృందం పేర్కొంది.