పృథ్వీషా కాబోయే భార్య ఆకృతి సోషల్ మీడియాలో సంచలన పోస్ట్!

టీమిండియా యువ క్రికెటర్ పృథ్వీ షా వ్యక్తిగత జీవితం మరోసారి వార్తల్లో నిలిచింది. అతని కాబోయే భార్య, నటి ఆకృతి అగర్వాల్‌తో బంధం బీటలు వారిందంటూ ఊహాగానాలు జోరందుకున్నాయి. ఆకృతి తన ఇన్‌స్టాగ్రామ్‌లో పెట్టిన ఓ సంచలన పోస్ట్ ఈ ప్రచారానికి ఆజ్యం పోసింది. నిశ్చితార్థం తర్వాత తాను మోసానికి గురయ్యానంటూ ఆమె ఆవేదన వ్యక్తం చేయడం కలకలం రేపుతోంది.

ఆకృతి తన ఇన్‌స్టాగ్రామ్ స్టోరీలో, "నన్ను ఎన్నోసార్లు మోసం చేశారు, అయినా నేను ఒక్క మాట కూడా అనలేదు. జీవితంలో మరో ముందడుగు (నిశ్చితార్థం) వేశాక కూడా ఇలాంటి పరిస్థితి వస్తుందని నమ్మలేకపోతున్నాను. బయట వస్తున్న గాసిప్‌లన్నీ నిజమే. అతని గురించి సోషల్ మీడియాలో మీరు చూస్తున్నది 100 శాతం వాస్తవం" అని రాసుకొచ్చారు. అయితే, ఈ పోస్ట్‌లో ఆమె ఎక్కడా పృథ్వీ షా పేరును నేరుగా ప్రస్తావించలేదు. కొద్దిసేపటికే ఈ పోస్ట్‌ను తొలగించినప్పటికీ, దాని స్క్రీన్‌షాట్లు సోషల్ మీడియాలో వైరల్‌గా మారాయి.

ఈ ఏడాది మార్చి 8న పృథ్వీ షా, ఆకృతి అగర్వాల్‌ల నిశ్చితార్థం జరిగింది. తాజా పరిణామాల నేపథ్యంలో వీరిద్దరూ ఇన్‌స్టాగ్రామ్‌లో ఒకరినొకరు అన్‌ఫాలో చేసుకున్నట్లు వార్తలు వస్తున్నాయి. దీనిపై నెటిజన్లు భిన్నాభిప్రాయాలు వ్యక్తం చేస్తున్నారు. కొందరు పృథ్వీ షాపై గతంలో వచ్చిన ఆరోపణలను గుర్తుచేస్తుండగా, మరికొందరు అధికారిక ప్రకటన వచ్చేవరకు వేచి చూడాలని సూచిస్తున్నారు.

గత కొంతకాలంగా ఫామ్, ఫిట్‌నెస్, క్రమశిక్షణ సమస్యలతో కెరీర్‌లో ఒడిదొడుకులు ఎదుర్కొంటున్న పృథ్వీ షా, ప్రస్తుతం దేశవాళీ క్రికెట్‌లో మహారాష్ట్ర జట్టుకు ఆడుతున్నాడు.