భారత్‌కు వెళ్తే ఫోన్ తీసుకెళ్తా.. చైనాకు మాత్రం తీసుకెళ్లను: యూఎస్ సెనేటర్

అమెరికాకు భారత్ అత్యంత విశ్వసనీయ మిత్రదేశమని, కీలక వ్యూహాత్మక భాగస్వామి అని రిపబ్లికన్ సెనేటర్ స్టీవ్ డైన్స్ పేర్కొన్నారు. చైనాతో పోలిస్తే భారత్‌పై తమకు ఎంతటి నమ్మకం ఉందో వివరించేందుకు ఆయన తన వ్యక్తిగత ఫోన్‌ను ఉదాహరణగా చూపారు. తాను భారత్‌ పర్యటనకు వెళ్లేటప్పుడు వ్యక్తిగత ఫోన్‌ను వెంట తీసుకెళ్తానని, అదే చైనా పర్యటనకు వెళ్తే మాత్రం భద్రతా కారణాల దృష్ట్యా దానిని వాషింగ్టన్‌లోనే వదిలి వెళ్తానని ఆయన వెల్లడించారు.

యూఎస్-ఇండియా స్ట్రాటజిక్ పార్ట్‌నర్‌షిప్ ఫోరమ్ సదస్సులో ఆయన మాట్లాడుతూ, "నేను చైనాకు వెళ్లేటప్పుడు నా ఫోన్ బీజింగ్‌కు తీసుకువెళ్లను. అది వాషింగ్టన్ డీసీలోని నా డెస్క్‌పైనే ఉంటుంది. కానీ నేను ఢిల్లీకి గానీ, భారత్‌లోని మరే ఇతర ప్రాంతానికి గానీ వెళ్లేటప్పుడు నా ఫోన్ ఎప్పుడూ నాతోనే ఉంటుంది. భారత్ అత్యంత విశ్వసనీయమైన మిత్రదేశం అనడానికి ఇదే నిదర్శనం" అని స్పష్టం చేశారు.

చైనాతో కొనసాగుతున్న ఉద్రిక్తతల నేపథ్యంలో అమెరికా వ్యూహాత్మక ఆలోచనా సరళికి సెనేటర్ వ్యాఖ్యలు అద్దం పడుతున్నాయి. బీజింగ్‌తో సంబంధాలు ముఖ్యమైనవే అయినప్పటికీ, భారత్‌తో పటిష్టమైన బంధం అత్యంత ఆవశ్యకమని ఆయన అభిప్రాయపడ్డారు. ప్రపంచంలోనే అతిపెద్ద ప్రజాస్వామ్య దేశంగా, అత్యంత కీలక భాగస్వామిగా భారత్ పోషిస్తున్న పాత్రను ఈ సందర్భంగా ఆయన కొనియాడారు.