ఝార్ఖండ్ రాజ్యసభ ఎన్నికల్లో ఊహించని ట్విస్ట్.. క్రాస్ ఓటింగ్తో కాంగ్రెస్కు కోలుకోలేని షాక్!
- ఝార్ఖండ్లోని రెండు రాజ్యసభ స్థానాలకు జూన్ 18న ఓటింగ్
- చెరో స్థానాన్ని గెలుచుకున్న జేఎంఎం, ఎన్డీఏ కూటమి
- 56 మంది ఎమ్మెల్యేల బలం ఉన్నా కాంగ్రెస్ అభ్యర్థి ప్రణవ్ ఝా ఓటమి
- ఎన్డీఏ మద్దతు పొందిన స్వతంత్ర అభ్యర్థి పరిమళ్ నత్వాని గెలుపు
- కూటమి భాగస్వామ్య పక్షాలైన ఆర్జేడీ, సీపీఎం ద్రోహం చేశాయన్న కాంగ్రెస్
- మిజోరంలోని ఏకైక రాజ్యసభ స్థానంలో అధికార జడ్పీఎం విజయం
తీవ్ర ఉత్కంఠ రేపిన రెండో స్థానం పోరులో, కేవలం 24 మంది ఎమ్మెల్యేల బలమున్న ఎన్డీఏ కూటమి వ్యూహాత్మకంగా రిలయన్స్ ఇండస్ట్రీస్ కార్పొరేట్ వ్యవహారాల డైరెక్టర్ పరిమళ్ నత్వానిని స్వతంత్ర అభ్యర్థిగా బరిలోకి దించింది. జూన్ 18న జరిగిన కౌంటింగ్లో నత్వానికి 28 ఓట్లు రాగా, ఆయనతో పోటీ పడిన కాంగ్రెస్ అభ్యర్థి ప్రణవ్ ఝా కేవలం 20 ఓట్లు మాత్రమే సాధించి పరాజయాన్ని చవిచూశారు. పోలైన ఓట్లలో మూడు ఓట్లు చెల్లకుండా పోయాయి. ఈ ఫలితం రాగానే బీజేపీ శ్రేణులు అసెంబ్లీ ప్రాంగణంలో పెద్ద ఎత్తున సంబరాలు జరిపారు. తన విజయానికి సహకరించిన ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, స్థానిక బీజేపీ నాయకత్వానికి నత్వాని ప్రత్యేక కృతజ్ఞతలు తెలిపారు. నాలుగోసారి రాజ్యసభకు ఎన్నికవడం, అందులోనూ ఝార్ఖండ్ నుంచి మూడోసారి ప్రాతినిధ్యం వహించడం గర్వంగా ఉందని ఆయన పేర్కొన్నారు.
ఈ ఓటమిపై కాంగ్రెస్ తీవ్ర ఆగ్రహం వ్యక్తం చేస్తూ సొంత కూటమిపైనే ద్రోహం ఆరోపణలు చేసింది. కాంగ్రెస్ ఎన్నికల ఏజెంట్ కె.రాజు విలేకరులతో మాట్లాడుతూ.. తమ భాగస్వామ్య పక్షాలైన ఆర్జేడీ, సీపీఎం తమకు ఓటు వేయకుండా ద్రోహం చేశాయని, కేవలం జేఎంఎం మాత్రమే తమకు నాలుగు ఓట్లను బదిలీ చేసిందని పేర్కొన్నారు. ఈ విషయాన్ని ముఖ్యమంత్రి హేమంత్ సోరెన్ వద్దకు తీసుకెళ్లనున్నట్లు చెప్పారు.
ఇదిలావుండగా, ఈశాన్య రాష్ట్రమైన మిజోరంలో అధికార జోరామ్ పీపుల్స్ మూవ్మెంట్ (జడ్పీఎం) సరికొత్త చరిత్ర సృష్టించింది. మిజోరం ఏకైక రాజ్యసభ స్థానానికి జరిగిన ఎన్నికల్లో జడ్పీఎం అభ్యర్థి కె.లాల్త్లువాంగ్కిమా 26 ఓట్లతో ఘనవిజయం సాధించి, ఆ పార్టీ తరఫున పార్లమెంటు ఎగువ సభలో మొట్టమొదటి ప్రతినిధిగా రికార్డు నెలకొల్పారు. ఆయన తన ప్రత్యర్థి, మిజో నేషనల్ ఫ్రంట్ (ఎంఎన్ఎఫ్) అభ్యర్థి జోథాన్సంగి హ్మర్ను ఓడించారు.
