సూపర్ స్టార్ రజనీకాంత్తో సిద్ధాంత విభేదాలు.. దర్శకుడు భారతీరాజా వ్యక్తిత్వంలోని మరో కోణం!
- వృత్తి పరంగా రజనీ, భారతీరాజా మధ్య మంచి అనుబంధం
- అయితే సామాజిక, రాజకీయ అంశాలపై విభేదించుకున్న సినీ దిగ్గజాలు
- కావేరి జలాల వివాదం సమయంలో విభేదాలు
దిగ్గజ దర్శకుడు భారతీరాజా మరణంతో ఆయన సినీ ప్రయాణానికి సంబంధించిన ఎన్నో ఆసక్తికరమైన విషయాలు మరోసారి చర్చనీయాంశంగా మారాయి. ప్రేమకథల నుండి సస్పెన్స్ థ్రిల్లర్ల వరకు ఎన్నో అద్భుత చిత్రాలను అందించిన భారతీరాజా గారి కెరీర్లో.. సూపర్ స్టార్ రజనీకాంత్తో ఆయనకున్న అనుబంధం, వారి మధ్య ఉన్న అభిప్రాయ భేదాలు ఎప్పుడూ ఒక హాట్ టాపిక్గా నిలిచేవి.
భారతీరాజా దర్శకత్వంలో రజనీకాంత్ నటించిన ‘పదహారేళ్ల వయసు’ (తమిళ్), ‘కోడి పరక్కుదు’ వంటి చిత్రాలు ప్రేక్షకులను ఎంతగానో ఆకట్టుకున్నాయి. అయితే, వృత్తిపరంగా ఒకరినొకరు గౌరవించుకున్నప్పటికీ... పలు సామాజిక, రాజకీయ అంశాలపై వీరిద్దరి దారులు వేరుగా ఉండేవి. ముఖ్యంగా తమిళనాడు – కర్ణాటక మధ్య జరిగిన కావేరి జలాల వివాదం సమయంలో వీరి మధ్య విభేదాలు బహిరంగంగా కనిపించాయి. ఆనాడు తమిళ సినీ పరిశ్రమ చేపట్టిన ఆందోళనలపై రజనీకాంత్ చేసిన వ్యాఖ్యలను భారతీరాజా తీవ్రంగా విమర్శించారు. అలాగే, రజనీకాంత్ రాజకీయాల్లోకి వస్తున్నట్లు ప్రకటించినప్పుడు కూడా... తమిళనాడును ఇక్కడి సంస్కృతి, భాష, ప్రాంతీయ భావజాలాన్ని పూర్తిగా అర్థం చేసుకున్న నాయకులే పరిపాలించాలని భారతీరాజా నిర్మొహమాటంగా స్పష్టం చేశారు. ఈ వ్యాఖ్యలు అప్పట్లో పెద్ద సంచలనంగా మారాయి.
అయితే ఈ విమర్శలు కేవలం సిద్ధాంతపరమైనవే కానీ, వ్యక్తిగతంగా రజనీకాంత్పై ఆయనకు ఎలాంటి శత్రుత్వం లేదని వారి సన్నిహితులు చెబుతుంటారు. తమిళ సంస్కృతి, భాషపై ఉన్న అమితమైన ప్రేమ వల్లే ఆయన తన అభిప్రాయాలను అంత నిర్భయంగా చెప్పేవారని సినీ విశ్లేషకులు భావిస్తారు. తనకు నచ్చిన విషయానికి మద్దతు ఇవ్వడం, విభేదించిన అంశంపై బహిరంగంగా స్పందించడం ఆయన సహజ స్వభావం. అభిప్రాయ భేదాలు ఎలా ఉన్నా, తమిళ సినీ చరిత్రలో వీరిద్దరి ముద్ర చెరగనిది.
