మోదీపై ప్రశంసలు, భారత్ వాణిజ్యంపై ట్రంప్ విమర్శలు
- ప్రధాని మోదీని మంచి మిత్రుడిగా అభివర్ణించిన ట్రంప్
- గతంలో భారత్ అధిక సుంకాలతో అమెరికాను వాడుకుందన్న ఆరోపణ
- ఇప్పుడు పరిస్థితి తారుమారైందని, తాము లాభపడుతున్నామని వ్యాఖ్య
- ఇరు దేశాల మధ్య త్వరలోనే వాణిజ్య ఒప్పందం కుదురుతుందని ధీమా
గురువారం వైట్హౌస్లో విలేకరులతో మాట్లాడిన ట్రంప్.. "మీ ప్రధాని అంటే నాకు ఎంతో ఇష్టం. ఆయన నా మంచి మిత్రుడు. మేమిద్దరం సమన్వయంతో ముందుకు సాగుతున్నాం, త్వరలోనే ఒక ఒప్పందానికి వస్తాం" అని తెలిపారు. అయితే, గతంలో భారత్ భారీ సుంకాలను విధిస్తూ అమెరికాను వాణిజ్యపరంగా వాడుకుందని ఆయన ఆరోపించారు. "ఏళ్ల తరబడి భారత్ అమెరికాను ఒక అవకాశంగా మలుచుకుంది. మా వస్తువులపై భారీ సుంకాలు విధించింది. కానీ ఇప్పుడు పరిస్థితి పూర్తిగా మారింది. ప్రస్తుతం మేము భారత్తో లాభదాయకమైన వాణిజ్యాన్ని సాగిస్తున్నాం" అని ఆయన వ్యాఖ్యానించారు.
ఇరు దేశాల మధ్య నెలకొన్న వాణిజ్య అడ్డంకులు, సుంకాలు, ఇతర ఆర్థిక అంశాలపై అమెరికా, భారత అధికారులు ఇటీవల చర్చలు జరిపిన నేపథ్యంలో ట్రంప్ వ్యాఖ్యలు ప్రాధాన్యత సంతరించుకున్నాయి. నాలుగు రోజుల పాటు జరిగిన ఈ చర్చలు సానుకూల వాతావరణంలో ముగిసినట్లు సమాచారం.
