అందరికీ నచ్చాల్సిన పనిలేదు.. మా కష్టాన్ని గుర్తించండి: ఆన్‌లైన్ ట్రోల్స్‌పై చరణ్ కూల్ రియాక్షన్

సినిమాలు థియేటర్లలోకి రాకముందే సోషల్ మీడియాలో కొందరు వాటి భవిష్యత్తుపై తీర్పులు ఇచ్చేస్తున్న ట్రెండ్‌పై గ్లోబల్ స్టార్ రామ్ చరణ్ స్పందించారు. తన నియంత్రణలో లేని అభిప్రాయాల గురించి ఆలోచించే కన్నా, తన పనిపైనే దృష్టి పెడతానని ఆయన స్పష్టం చేశారు.

ఓ సినిమాను చూడకుండానే దానిపై విపరీతమైన నెగిటివ్ ప్రచారం చేయడం గురించి ఐఏఎన్‌ఎస్‌తో మాట్లాడుతూ చరణ్ తన అభిప్రాయాన్ని పంచుకున్నారు. "దీనిపై నాకంటూ ప్రత్యేక అభిప్రాయం లేదు. మన నియంత్రణలో ఉన్నది మాత్రమే మనం చేయగలం. నాకు అర్థం కాని, అదుపు చేయలేని విషయాలపై నేను స్పందించను. నా పని నేను చేసుకోవాలి" అని చెర్రీ అన్నారు.

రామ్ చరణ్ నటిస్తున్న 'పెద్ది' సినిమా విడుదల తేదీ రెండుసార్లు మారడంతో ఆన్‌లైన్‌లో దీనిపై విస్తృతమైన చర్చ జరిగింది. ఈ నేపథ్యంలోనే చరణ్ ఈ వ్యాఖ్యలు చేశారు. "మేం మా పని పట్ల నిజాయతీగా ఉన్నాం. చివరికి మేం సంతోషంగా ఉన్నాం. ప్రతి ఒక్కరికీ మా పని నచ్చాల్సిన అవసరం లేదు. కానీ, కనీసం మా శ్రమను గుర్తిస్తారని ఆశిస్తున్నా. వారికి అది నచ్చకపోయినా పర్వాలేదు" అని చరణ్ వివరించారు.

బుచ్చిబాబు సానా దర్శకత్వం వహిస్తున్న 'పెద్ది' ఒక స్పోర్ట్స్ యాక్షన్ డ్రామా. ఇందులో రామ్ చరణ్ క్రికెట్, రెజ్లింగ్, స్ప్రింటింగ్ వంటి మూడు క్రీడల్లో రాణించే అథ్లెట్‌గా కనిపించనున్నారు. జాన్వీ కపూర్, శివ రాజ్‌కుమార్, జగపతి బాబు, బొమన్ ఇరానీ వంటి భారీ తారాగణం న‌టించిన‌ ఈ చిత్రం జూన్ 4న ప్రేక్షకుల ముందుకు రానుంది. 'మగధీర'తో స్టార్‌డమ్ అందుకున్న చరణ్, 'రంగస్థలం'తో నటుడిగా ఉన్నత స్థాయికి చేరుకుని, 'ఆర్ఆర్ఆర్‌' చిత్రంతో ప్రపంచవ్యాప్తంగా గుర్తింపు పొందారు.