ప్రపంచంలో 50 హాటెస్ట్ సిటీస్.. అన్నీ భారత్‌లోనే!

భారతదేశం తీవ్రమైన వడగాల్పులతో అల్లాడుతున్న వేళ ఒక అసాధారణ, అపూర్వమైన రికార్డు నమోదైంది. ఏప్రిల్ 27వ తేదీన ప్రపంచవ్యాప్తంగా అత్యధిక ఉష్ణోగ్రతలు నమోదైన టాప్ 50 నగరాలు అన్నీ భారత్‌లోనే ఉండటం తీవ్ర ఆందోళన కలిగిస్తోంది. గాలి నాణ్యత, వాతావరణ పర్యవేక్షణ సంస్థ 'ఏక్యూఐ.ఇన్' (AQI.in) ఈ షాకింగ్ డేటాను విడుదల చేసింది. ఆధునిక కాలంలో ఇలాంటి ఘటనకు ఆధారాలు లేవని, ఇది ‘సాధారణ ఏప్రిల్ కాదు’ అని ఆ సంస్థ స్పష్టం చేసింది.

ఏక్యూఐ.ఇన్ నివేదిక ప్రకారం ఏప్రిల్ 27న ప్రపంచంలోనే అత్యధిక ఉష్ణోగ్రత ఉత్తరప్రదేశ్‌లోని బాందా నగరంలో 46.2 డిగ్రీల సెల్సియస్‌గా నమోదైంది. ఈ జాబితాలో మధ్యప్రాచ్యం, ఆఫ్రికా లేదా ఆస్ట్రేలియా నుంచి ఒక్క నగరం కూడా లేకపోవడం గమనార్హం. జాబితాలోని 50 నగరాల్లో అత్యధికంగా ఉత్తరప్రదేశ్ నుంచి 21 నగరాలు, మహారాష్ట్రలోని విదర్భ ప్రాంతం నుంచి 10 నగరాలు ఉన్నాయి.

ఈ నగరాల్లో సగటు గరిష్ఠ ఉష్ణోగ్రత 44.7 డిగ్రీలుగా ఉంది. 50 నగరాల్లో సగటు ఉష్ణోగ్రతలు మానవ శరీర ఉష్ణోగ్రత (37.5°C) కంటే ఎక్కువగా ఉండటం ప్రజారోగ్యానికి పెను ముప్పు అని ఏక్యూఐ.ఇన్ హెచ్చరించింది. వాతావరణ మార్పుల కారణంగానే భారత్‌లో వడగాల్పుల తీవ్రత, భౌగోళిక విస్తరణ, కాలపరిమితి పెరుగుతున్నాయని వాతావరణ శాస్త్రవేత్తలు విశ్లేషిస్తున్నారు. ఈ ఘటన, వాతావరణ మార్పుల తీవ్రతకు, భారత్‌పై దాని ప్రభావానికి ఒక స్పష్టమైన హెచ్చరికగా నిపుణులు భావిస్తున్నారు.