Hardik Pandya: నా జీవితంలోకి ఆమె వచ్చాకే గెలుస్తున్నా.. మరో పదేళ్లు ఆడతా, 10 కప్పులు గెలుస్తా: హార్దిక్ పాండ్యా

భారత జట్టు వరుసగా రెండోసారి టీ20 ప్రపంచకప్ గెలవడంలో కీలక పాత్ర పోషించిన స్టార్ ఆల్‌రౌండర్ హార్దిక్ పాండ్యా, తన భవిష్యత్ లక్ష్యాలపై సంచలన ప్రకటన చేశాడు. తనలో ఇంకా చాలా క్రికెట్ మిగిలి ఉందని, రాబోయే పదేళ్లలో మరో 10 ఐసీసీ టైటిళ్లను గెలవడమే తన లక్ష్యమని స్పష్టం చేశాడు. 2026 టీ20 వరల్డ్ కప్‌ను స్వదేశంలో గెలిచిన అనంతరం అతను తన ఆనందాన్ని, భావోద్వేగాలను పంచుకున్నాడు.

ఈ విజయం తర్వాత హార్దిక్ మాట్లాడుతూ.. "నాలో ఇంకా పదేళ్ల క్రికెట్ మిగిలి ఉంది. ఈ సమయంలో మరో 10 ఐసీసీ టైటిళ్లు గెలవాలని కోరుకుంటున్నాను. అదే నా లక్ష్యం" అని ధీమా వ్యక్తం చేశాడు. స్వదేశంలో ప్రపంచకప్ గెలవడంపై స్పందిస్తూ.. "ఇది చాలా భావోద్వేగమైన క్షణం. భారత గడ్డపై కప్ గెలవడంతో ప్రజల ఉత్సాహం అద్భుతంగా ఉంది. ఈ విజయం కోసం మేము చాలా కష్టపడ్డాం. నిజానికి ఫైనల్ జరగడానికి ఒక రోజు ముందు నుంచే మేము ఛాంపియన్లమని నాకు తెలుసు. ఓటమి గురించి ఆలోచనే రాలేదు. గెలుస్తామనే పూర్తి ఆత్మవిశ్వాసంతో ఉన్నాం" అని తెలిపాడు.

ఈ సందర్భంగా తన వ్యక్తిగత జీవితానికి సంబంధించిన ఒక ఆసక్తికర విషయాన్ని కూడా హార్దిక్ పంచుకున్నాడు. టోర్నమెంట్ ఆద్యంతం తనతో ఉన్న గర్ల్‌ఫ్రెండ్ మహికా శర్మ గురించి మాట్లాడుతూ.. "మహిక నా జీవితంలోకి వచ్చినప్పటి నుంచి నాకు విజయాలే దక్కుతున్నాయి" అంటూ హిందీలో ఎమోషనల్ కామెంట్ చేశాడు.

ఇంగ్లండ్‌తో జరిగిన సెమీ ఫైనల్‌లో కీలకమైన 19వ ఓవర్ వేసినప్పటి అనుభవాన్ని కూడా హార్దిక్ గుర్తుచేసుకున్నాడు. ఆ ఒత్తిడి సమయంలో 2024 టీ20 ప్రపంచకప్ ఫైనల్ అనుభవాలు తనకు ఎంతగానో సహాయపడ్డాయని చెప్పాడు. "దేవుడికి నా కృతజ్ఞతలు. ఇంగ్లండ్‌పై 19వ ఓవర్ వేస్తున్నప్పుడు, నాకు 2024 వరల్డ్ కప్ ఫైనల్ గుర్తొచ్చింది. అదే విషయాన్ని ఇషాన్, అభిషేక్‌లకు కూడా చెప్పాను. బ్యాటింగ్‌కు వెళ్లేటప్పుడు మంచి జ్ఞాపకాలను గుర్తుచేసుకోమని వారికి సూచించాను" అని పాండ్యా వివరించాడు. రెండు టీ20 ప్రపంచకప్‌లు గెలిచిన కొద్దిమంది ఆటగాళ్ల జాబితాలో చేరిన హార్దిక్, రాబోయే దశాబ్దంలో ప్రపంచ క్రికెట్‌లో భారత ఆధిపత్యాన్ని కొనసాగించాలనే బలమైన ఆకాంక్షను వ్యక్తం చేశాడు.