F-15E Strike Eagle: కువైట్ లో కూలిన అమెరికా యుద్ధ విమానం.. వీడియో ఇదిగో!

కువైట్‌లోని అమెరికా సైనిక స్థావరం సమీపంలో యూఎస్ ఎయిర్ ఫోర్స్‌కు చెందిన ఎఫ్-15ఈ స్ట్రైక్ ఈగిల్ యుద్ధ విమానం కుప్పకూలింది. విమానం భూమిని ఢీకొట్టడానికి కొన్ని క్షణాల ముందే పైలట్ చాకచక్యంగా ఎజెక్ట్ అయ్యి పారాచూట్ సాయంతో కిందకు దిగాడు. దీనికి సంబంధించిన దృశ్యాలు సోషల్ మీడియాలో వైరల్ అవుతున్నాయి. విమానం అదుపుతప్పి గాల్లో గింగిరులు కొడుతూ కింద పడిపోవడం వీడియోల్లో స్పష్టంగా కనిపిస్తోంది. ప్రాథమిక సమాచారం ప్రకారం.. పైలట్‌కు స్థానికులు సాయం చేసి సురక్షిత ప్రాంతానికి తరలించారు. ఆయనకు ఎలాంటి ప్రాణాపాయం లేదని, స్వల్ప గాయాలతో బయటపడ్డాడని తెలుస్తోంది.

ఈ ప్రమాదం సాంకేతిక లోపం వల్ల జరిగిందా? లేక పొరపాటున జరిగిన 'ఫ్రెండ్లీ ఫైర్' వల్ల జరిగిందా? అనేది తెలియరాలేదు. ప్రస్తుతం ఇరాన్‌పై అమెరికా, ఇజ్రాయెల్ జరుపుతున్న 'ఆపరేషన్ ఎపిక్ ఫ్యూరీ' దాడుల నేపథ్యంలో పశ్చిమ ఆసియాలో యుద్ధ మేఘాలు కమ్ముకున్న తరుణంలో ఈ ప్రమాదం జరగడం ప్రాధాన్యం సంతరించుకుంది. ఈ ఘటనపై అమెరికా రక్షణ శాఖ ఇంకా అధికారిక ప్రకటన విడుదల చేయాల్సి ఉంది.

ఎఫ్-15ఈ స్ట్రైక్ ఈగిల్ ప్రత్యేకతలు
అమెరికా వైమానిక దళానికి చెందిన ఎఫ్-15ఈ స్ట్రైక్ ఈగిల్ ఒక శక్తిమంతమైన మల్టీరోల్ యుద్ధ విమానం. ఇది గగనతలంలో శత్రు విమానాలతో పోరాడటంతో పాటు, భూమిపై ఉన్న లక్ష్యాలను అత్యంత కచ్చితత్వంతో ధ్వంసం చేయగల సామర్థ్యాన్ని కలిగి ఉంటుంది. రాత్రివేళల్లో, అత్యంత ప్రతికూల వాతావరణ పరిస్థితుల్లో కూడా సుదీర్ఘ శ్రేణి లక్ష్యాలపై దాడులు చేసేలా దీనిని రూపొందించారు.

ఇందులో ఇద్దరు వ్యక్తులు కూర్చునేలా టెన్డమ్ కాక్‌పిట్, అదనపు ఇంధనం కోసం కన్ఫార్మల్ ట్యాంకులు మరియు అత్యాధునిక టార్గెటింగ్ వ్యవస్థలు ఉంటాయి. ఇతర విమానాల రక్షణ అవసరం లేకుండానే శత్రువుల లోతైన ప్రాంతాల్లోకి చొచ్చుకుపోయి దాడులు చేయగలగడం ఈ ఫైటర్ జెట్ ప్రత్యేకత అని రక్షణ రంగ నిపుణులు చెబుతున్నారు.